Dy persona të lidhur me futbollin e Milanos janë midis të arrestuarve nga policia nën akuzën e trafikut të lëndëve narkotike.

Luca Lucci është kapoja i tifozerisë ultra të Milanit në zonën jugore të stadiumit Meazza, ndërsa Massimo Mandelli është përgjegjësi i stjuardëve të Interit në stadium.

Lucci, 37 vjeç, përdorte selinë e shoqatës “Il Clan” si bazë për trafikun. Një vend që zakonisht shërbente për grumbullimin e tifozëve kuqezinj e që ishte shndërruar në destinacion ngarkesash të mëdha droge.

Policia arriti të interceptonte një kamion TIR brenda të cilin ishin 250 kile hashash e marijuanë e ardhur nga Shqipëria.

Edhe kundërshtari i tij sportiv, Massimo Mandelli, një ndër përgjegjësit e stjuardëve vullnetarë të Interit, ishte i lidhur me kanalin shqiptar prej nga furnizohej Lucci.

Mandelli furnizohej si nga shqiptarët, ashtu edhe nga kalabrezët, të cilët nuk kishin lidhje midis tyre.