Një metodë e re ngjyrosjeje është prezantuar në industrinë e modës. Studiues nga TU Delft dhe marka e modës Hul le Kes kanë treguar mundësinë e ngjyrosjes së veshjeve duke përdorur pigment të përftuar nga mbetjet e krijuara gjatë pastrimit të ujërave të ndotura.

Sipas studiuesve, procesi përdor një pigment novator të nxjerrë nga ujërat e ndotura. Ky pigment përfitohet nga llumi i mbetur i impianteve të trajtimit të ujit dhe është një biopolimer i ngjashëm me melaninën. Melanina njihet për vetitë e saj funksionale, të cilat përfshijnë mbrojtjen nga rrezet UV, efektet antioksiduese, aktivitetin redoks dhe aftësinë për të lidhur metalet.

Melanina përdoret prej disa kohësh në industrinë e modës, por shpesh nxirret nga boja e sepjes. “Megjithatë, mbështetja te ky burim ngre shqetësime etike dhe kufizon disponueshmërinë për shkak të natyrës sezonale të peshkimit të sepjes. Edhe pse ekzistojnë metoda të sintezës kimike, studimet kanë treguar se melanina sintetike ndryshon në strukturë dhe funksion nga ajo e përftuar natyrshëm. Prandaj, aftësia për të rikuperuar material të ngjashëm me melaninën nga llumi i mbetjeve ofron një alternativë premtuese dhe më të qëndrueshme,” thuhet në njoftimin për shtyp.

Artikujt e parë të krijuar në bashkëpunim me markën e modës Hul le Kes shërbejnë si provë e konceptit. Para se këto veshje të dalin në treg, nevojiten testime dhe miratime të mëtejshme. Kjo përfaqëson një hap të rëndësishëm drejt një metode të re ngjyrosjeje.