Përshkallëzimi i konfliktit SHBA-Iran rrezikon të shndërrohet në një luftë më të gjerë rajonale

Shtetet e Gjirit po e ndjekin me shqetësim në rritje përshkallëzimin e ri të konfliktit mes Iranit dhe Shteteve të Bashkuara.

Një model sulmesh dhe kundërsulmesh tashmë është konsoliduar, ndërsa situata ndërlikohet edhe më tej nga tensionet në rritje mes Arabisë Saudite dhe Huthëve të mbështetur nga Irani në Jemen, të cilët janë të vendosur të thyejnë bllokadën e vendosur ndaj tyre.

Për momentin, rruga diplomatike duket pothuajse e vdekur. Vizitat e shumta të delegacioneve nga Pakistani dhe Katari në Iran, në përpjekje për të ruajtur armëpushimin, i kanë lënë vendin pesimizmit mes diplomatëve rajonalë. Vetë Katari është goditur dy herë gjatë përshkallëzimit të fundit.

Dronët iranianë kanë shënjestruar gjithashtu Omanin, vetëm pak ditë pasi të dy shtetet zhvilluan negociata për një skemë administrimi të Ngushticës së Hormuzit. Po ashtu, Garda Revolucionare Islamike e Iranit (IRGC) ka goditur anije që lundronin pranë bregdetit të Omanit. Trafiku në Ngushticën e Hormuzit është reduktuar në minimum.

Irani ka paralajmëruar vazhdimisht se është i gatshëm të intensifikojë sulmet ndaj vendeve fqinje që strehojnë baza ushtarake amerikane. Agjencia gjysmëzyrtare Fars publikoi një listë me pesë porte në Bahrejn, Arabinë Saudite, Kuvajt, Katar dhe Emiratet e Bashkuara Arabe, për të cilat tha se mund të bëhen objektiva nëse infrastruktura iraniane sulmohet.

Sipas mediave shtetërore iraniane, objektivat e goditura nga SHBA-ja ditët e fundit kanë përfshirë tunele, rrugë, ura dhe hekurudha, duke shtuar frikën se konflikti mund të dalë jashtë kontrollit.

“Çdo përshkallëzim nga SHBA-ja pasohet nga një përshkallëzim iranian, ndërsa secila palë përpiqet të vendosë pragje të reja parandalimi me çdo shkëmbim sulmesh” tha analisti izraelit Danny Citrinowicz.

Në vend që ta detyrojë Iranin të rikthehet në tryezën e negociatave, “një rezultat po aq i mundshëm është një konflikt që del përtej synimeve të të dyja palëve, duke u zgjeruar në një luftë shumë më të gjerë rajonale, me gjithnjë e më pak mundësi për rikthimin e diplomacisë”, shkroi Citrinowicz dje në platformën X.