Trump ndërron avionët pas Samitit të NATO-s! Pasiguria e mjetit të dhuruar nga Katari detyron Shërbimin Sekret të ndërhyjë

 Pas përfundimit të Samitit të NATO-s në Ankara, ish-presidenti Donald Trump u largua nga Turqia në rrethana të pazakonta. Pasi kishte udhëtuar drejt Ankarasë me një Boeing 747 të dhuruar nga Katari vitin e kaluar, Trump u detyrua të kthehej në Uashington me avionin e vjetër Air Force One.

Në një prononcim për gazetarët dhe përmes një postimi në Truth Social, Trump shpjegoi se avioni i Katarit u ridrejtua drejt bazës ajrore RAF Mildenhall në Angli dhe disa destinacioneve të tjera evropiane, me qëllim që ushtarët amerikanë të kishin mundësinë ta vizitonin, duke e cilësuar këtë devijim si një "udhëtim të shkurtër".

Megjithatë, The New York Times raporton se largimi i Trump nga Ankaraja ndodhi me nxitim, ku pasagjerëve në bord iu kërkua të mbanin perdet e dritareve të mbyllura gjatë gjithë kohës. Sipas gazetës, ky ndërrim mjetesh nuk ishte thjesht një manovër logjistike, por një masë sigurie e kërkuar nga Shërbimi Sekret.

Raporti thekson se, pavarësisht se administrata Trump përshpejtoi përmirësimet teknike të avionit të dhuruar nga Katari, proces që zakonisht kërkon vite, mjetit i mungojnë ende karakteristikat thelbësore të mbrojtjes që disponon Air Force One origjinal.

“Air Force One i ri është një avion i teknologjisë së fundit që është pajisur me protokolle sigurie të nivelit të lartë që sigurojnë sigurinë e Presidentit dhe stafit të tij”, tha në një deklaratë drejtori i komunikimit të Shtëpisë së Bardhë, Steven Cheung.

NYT raporton se, ky ndërrim ishte një masë paraprake sigurie dhe jo një reagim ndaj ndonjë kërcënimi specifik, siç mund të ishte ai nga Irani. Pasi zbarkoi në bazën RAF Mildenhall në Angli, Trump u transferua në avionin e vjetër për të përfunduar pjesën e mbetur të udhëtimit drejt Uashingtonit.