Digjen më shumë se 50 ton drogëra të ndryshme, me vlerë rreth 600 milionë dollarë në Myanmar

Autoritetet e Mianmarit dogjën sot në Yangon më shumë se 50 ton drogë të konfiskuara si heroinë, opium, ketaminë, metamfetaminë, marihuanë dhe metamfetaminë kristalore, me vlerë rreth 600 milionë dollarë.

Këtë vit, u shkatërruan dy herë më shumë droga të shtrenjta krahasuar me vitin e kaluar, u tha gazetarëve zyrtari i policisë Aung Myat Soe.

Vetëm në Yangon, u dogjën 31 lloje të ndryshme droge me vlerë rreth 321 milionë dollarë, tha ai.

Droga u dogj gjithashtu në Mandalay dhe Taunggi, kryeqytetin e shtetit Shan në pjesën lindore të vendit, me rastin e Ditës Ndërkombëtare të Kombeve të Bashkuara (OKB) Kundër Abuzimit me Drogë dhe Trafikimit të Paligjshëm.

Junta ushtarake në pushtet njoftoi se në janar kishte sekuestruar sasinë më të madhe të drogës në historinë e vendit.

Mianmari ka një histori të gjatë të prodhimit të drogës, të lidhur me pasigurinë politike dhe ekonomike të shkaktuar nga dekada të tëra konflikti të armatosur.

Vendi ka qenë një destinacion kryesor për drogat ilegale për Azinë Lindore dhe Juglindore, pavarësisht përpjekjeve të shumta për ta luftuar atë.

Ekspertët besojnë se trazirat dhe dhuna në Myanmar pasi ushtria mori pushtetin në vitin 2021 rritën prodhimin e drogës.

Qeveria pretendon se grupet militante në të gjithë vendin përdorin drogë për të financuar kryengritjet e tyre dhe se ata nuk janë të gatshëm të angazhohen në ndonjë proces paqeje sepse nuk duan të heqin dorë nga tregtia fitimprurëse e drogës.