Vala ekstreme e të nxehtit e çon sistemin shëndetësor të Francës në nivelin më të lartë të krizës

Kryeministri francez Sébastien Lecornu vendosi të enjten sistemin shëndetësor të Francës në nivelin më të lartë të krizës, ndërsa vala e të nxehtit vazhdon të përfshijë vendin, me temperatura që në disa zona kalojnë 40 gradë Celsius.

“Vala e të nxehtit që po prek vendin tonë vazhdon pa u zbutur dhe presioni mbi sistemin tonë shëndetësor po rritet”, tha Lecornu në një postim në X.

Ai njoftoi një mobilizim mbarëkombëtar, duke përfshirë staf shtesë në spitale, përshtatje operative për të ndihmuar spitalet të përballojnë temperaturat ekstreme dhe shtyrjen e procedurave jo urgjente.

Shërbimi meteorologjik francez, Météo France, lëshoi nivelin më të lartë të alarmit të kuq për 72 rajone të enjten, duke filluar nga mesdita, duke mbuluar pjesën më të madhe të vendit.

Temperatura nga 35 deri në 40 gradë u parashikuan në zona të gjera, ndërsa në disa rajone priten stuhi të forta përpara se temperaturat të ulen lehtësisht duke filluar nga e premtja.

Kompania shtetërore e energjisë EDF mbylli tre reaktorë bërthamorë dhe uli prodhimin në disa të tjerë, pasi temperaturat e larta të lumenjve kufizuan përdorimin e ujit për ftohje. Sipas kompanisë, këto masa ulën kapacitetin e prodhimit bërthamor të Francës me rreth 3.5%.

Ndërkohë, kryetari i bashkisë së Parisit, Emmanuel Grégoire, citohet nga televizioni TV1 Info të ketë deklaruar se numri i vdekjeve të lidhura me të nxehtin po rritet.

Ai paralajmëroi se temperaturat e larta nuk po prekin vetëm grupet vulnerabël, por edhe personat e moshës 50 deri në 70 vjeç, të cilët i nënvlerësojnë rreziqet.

Në periferi veriore të Parisit, në Saint-Gratien, një djalë 3-vjeçar humbi jetën të mërkurën në mbrëmje pasi mbeti i bllokuar brenda një automjeti. Shërbimet e emergjencës nuk arritën ta rikthenin në jetë, thanë prokurorët të enjten.

Hetuesit besojnë se fëmija kishte hyrë në makinën e parkuar të familjes dhe kishte bllokuar aksidentalisht veten brenda. Prindërit, të dy 37 vjeç, e gjetën më vonë fëmijën pa shenja jete në automjet.

Nëna u dërgua në spital në gjendje shoku. Prokuroria ka hapur një hetim për vrasje nga pakujdesia./ DPA News