Berlini zgjat për herë të fundit pjesëmarrjen në misionin paqeruajtës në Liban

Parlamenti i Gjermanisë të enjten zgjati për herë të fundit misionin detar të vendit në brigjet libaneze.

Një shumicë e madhe ligjvënësish mbështetën vazhdimin e pjesëmarrjes gjermane në misionin paqeruajtës të OKB-së UNIFIL, i cili pritet të përfundojë në fund të vitit.

Paqeruajtësit e Forcës së Përkohshme të OKB-së në Liban (UNIFIL), kanë monitoruar zonën kufitare midis Izraelit dhe Libanit që nga viti 1978.

Kryesisht me nxitjen e Uashingtonit, Këshilli i Sigurimit i OKB-së vendosi vitin e kaluar të përfundojë misionin. 

Qëllimi kryesor i operacionit të marinës gjermane është të ndërpresë dërgesat e armëve të destinuara për milicinë Hezbollah të mbështetur nga Irani, së bashku me mbështetjen e trajnimit për forcat e rregullta të armatosura libaneze.

Tërheqja e trupave gjermane pritet të përfundojë në fillim të vitit 2027. Për këtë qëllim, rezoluta e Bundestagut përcakton që numri maksimal i ushtarëve gjermanë të reduktohet nga 300 në 80 në ndërrimin e vitit. 

Kontingjenti i reduktuar do ta çojë më pas në përfundim të plotë misionin e gjatë./ DPA News.