IMO pezullon planin e evakuimit nga Hormuzi pas sulmit të anijes pranë Omanit

Organizata Ndërkombëtare Detare (IMO) tha të enjten se ka pezulluar planin e evakuimit për detarët e bllokuar në Ngushticën e Hormuzit, pas një sulmi ndaj një anijeje në Gjirin e Omanit.

“Jam informuar për një sulm sot në Gjirin e Omanit. Siguria e detarëve mbetet parësore”, tha Sekretari i Përgjithshëm i IMO-s, Arsenio Dominguez, në platformën e mediave sociale X.

“Për të siguruar qasje të koordinuar dhe siguri lundrimi, plani i evakuimit i IMO-s do të pezullohet deri në sqarime të mëtejshme”, shtoi ai.

Vendimi vjen disa orë pasi IMO dhe Omani njoftuan një plan evakuimi për më shumë se 11,000 detarë të bllokuar në rajon, për shkak të tensioneve të larta dhe shqetësimeve për sigurinë detare.

Më herët të enjten, qendra e Operacioneve Tregtare Detare të Mbretërisë së Bashkuar (UKMTO) tha se një anije mallrash u godit nga një predhë e panjohur pranë Omanit, duke shkaktuar dëme në urën e anijes. Nuk u raportuan viktima apo dëme mjedisore./ AA.