Mijëra prona në Irlandë në 'rrezik' nga erozioni bregdetar

Sipas një studimi të kryer së fundmi, mijëra prona dhe qindra kilometra rrugë në Irlandë janë në rrezik nga erozioni bregdetar dhe rritja e nivelit të detit, ndërsa qeverisë i është bërë thirrje të fillojë planifikimin e zhvendosjes së komuniteteve të cenueshme, transmeton Anadolu.

“Pronarët e shtëpive nuk mund të lihen thjesht të përpihen nga deti”, thuhet në studimin e raportuar nga transmetuesi publik irlandez RTE, i cili bën thirrje për mekanizma urgjent ligjor dhe financiar për të mbështetur zhvendosjen e banesave dhe infrastrukturës.

Dokumenti i punës, i porositur nga Këshilli Këshillimor për Ndryshimet Klimatike të Irlandës dhe i përgatitur nga Universiteti Galway, tha se anketimet e kryera në tetë nga 19 qarqet bregdetare të vendit identifikuan pothuajse 2.300 prona dhe 570 kilometra rrugë që aktualisht janë në rrezik.

Sipas studimit, numri i pronave të ekspozuara ndaj këtij rreziku pritet të dyfishohet deri në vitin 2050.

Studimi u bëri thirrje autoriteteve të kalojnë përtej monitorimit të erozionit bregdetar dhe të zbatojnë një plan kombëtar gjithëpërfshirës për erozionin bregdetar, i cili do të përfshijë planet për zhvendosjen e shtëpive, bizneseve, lidhjeve të transportit dhe infrastrukturës tjetër kritike.

Autori kryesor i studimit, Eugene Farrell, tha se zhvendosja e planifikuar nga vijat bregdetare që po gërryhen “nuk është opsionale” dhe kërkon veprim të menjëhershëm.

Raporti i studimit bëri gjithashtu thirrje për krijimin e një kornize kombëtare kompensimi, rregullore më të forta të planifikimit dhe zbulim të detyrueshëm të rreziqeve nga erozioni dhe përmbytjet në transaksionet e pronave.

Sipas vlerësimeve të cituara në raport, dëmet e lidhura me rritjen e nivelit të detit në Irlandë mund të arrijnë në 2 miliardë euro në vit deri në vitin 2050 dhe në 7 miliardë euro në vit deri në vitin 2100.