Disa ligjvënës gjermanë të Partisë Social Demokratike (SPD), e cila është bashkëqeverisëse, i bënë thirrje të enjten partisë së tyre, të miratojë një qëndrim më të ashpër ndaj Izraelit për shkak të politikave të tij brutale në Gaza, Bregun Perëndimor dhe Liban.

Izraeli është përgjegjës për dhjetëra mijëra vdekje në Rripin e Gazës, “një politikë të pamëshirshme vendbanimesh në Bregun Perëndimor dhe vuajtje masive midis popullsisë civile në Liban”, tha për Der Spiegel Adis Ahmetovic, zëdhënës i politikës së jashtme për grupin parlamentar të SPD-së në Bundestag.

“Si SPD, ne duhet t’i shpallim qartë këto shkelje të vazhdueshme të së drejtës ndërkombëtare nëse nuk duam të akuzohemi për zbatimin e standardeve të dyfishta”, shtoi ai.

Ndërkohë, ligjvënësja e SPD-së, Isabel Cademartori, bëri thirrje për një qëndrim më të qartë mbi konfliktin në Lindjen e Mesme.

Duke iu drejtuar udhëheqësve kryesorë të partisë, Lars Klingbeil dhe Baerbel Bas, ajo tha: “Prej kohësh kam dashur që udhëheqja e partisë të deklarojë qartë se veprimet e Izraelit në Rripin e Gazës shkelin ligjin ndërkombëtar dhe të veprojë në përputhje me rrethanat.”

Nëse BE-ja po negocion masa kundër qeverisë izraelite, Gjermania nuk duhet t'i bllokojë më ato, i tha ajo Der Spiegel.

“Fakti që nuk po mbajmë një qëndrim më të qartë po i kushton besimit dhe prestigjit të SPD-së”, tha Cademartori.

Kritikët akuzojnë qeverinë gjermane të qendrës së djathtë se nuk u bashkua me vendet e tjera në dënimin e veprimeve brutale ushtarake të Izraelit gjatë luftës në Gaza, si shkelje të së drejtës ndërkombëtare.

Ministri i Jashtëm gjerman Johann Wadephul pranoi të mërkurën se qëndrimi i Berlinit ndaj luftës Rusi-Ukrainë dhe ndaj Izraelit mund t'i ketë kushtuar vendit votat që i nevojiteshin për të fituar një vend në këshill.

Gjermania u mposht nga Portugalia dhe Austria në raundin e parë të votimit në Asamblenë e Përgjithshme të OKB-së, duke humbur një nga dy vendet e rezervuara për Grupin e Evropës Perëndimore dhe të Tjerët për mandatin 2027-2028./ AA.