Letër urgjente për mbrojtjen e misionit humanitar të ‘Global Sumud Flotilla’

Aktivistët e Global Sumud Flotilla i kanë dërguar një letër urgjente autoriteteve diplomatike dhe institucioneve ndërkombëtare për të kërkuar ndërhyrje të menjëhershme në mbrojtje të pjesëmarrësve në misionin humanitar paqësor. Anijet e flotiljes, sipas tyre, janë ndaluar dhe kontrolluar nga autoritetet izraelite brenda zonës qipriote të kërkim-shpëtimit (SAR).

Në letrën drejtuar institucioneve ndërkombëtare dhe autoriteteve kompetente, theksohet se kalimi i sigurt dhe pa pengesa i këtyre anijeve mbrohet nga e drejta ndërkombëtare, përfshirë Konventën e Kombeve të Bashkuara mbi të Drejtën e Detit (UNCLOS).

Sipas letrës, ndërhyrja ndaj këtij misioni humanitar përbën një çështje serioze juridike dhe humanitare, pasi shtetet kanë detyrime të qarta për të garantuar sigurinë e personave në det dhe për të mos penguar ndihmën humanitare.

Dokumenti përmend disa instrumente kryesore të së drejtës ndërkombëtare:

Konventën Evropiane për të Drejtat e Njeriut, veçanërisht nenet 2, 3, 5 dhe 6;

Paktin Ndërkombëtar për të Drejtat Civile dhe Politike (ICCPR);

nenin 98 të UNCLOS dhe konventat ndërkombëtare SOLAS dhe SAR, që detyrojnë shtetet të ofrojnë ndihmë për personat në rrezik në det;

nenin 21 të Traktatit të Bashkimit Evropian, i cili kërkon që BE-ja të veprojë në përputhje me të drejtat e njeriut dhe të drejtën ndërkombëtare;

nenin 8(2)(b)(xxv) të Statutit të Romës, që ndalon pengimin e ndihmës humanitare në zonat e konfliktit.

Në mision marrin pjesë 35 shtetas italianë, ndërsa tetë prej anijeve lundrojnë nën flamurin italian. Organizatorët dhe mbështetësit e flotiljes kërkojnë ndërhyrje të menjëhershme diplomatike dhe ligjore për të garantuar sigurinë e ekuipazheve dhe vazhdimin paqësor të misionit humanitar.

Ata paralajmërojnë se çdo pengesë ndaj kësaj nisme jo të dhunshme rrezikon jo vetëm jetën e pjesëmarrësve, por edhe parimet themelore të së drejtës ndërkombëtare humanitare.

Apeli i drejtohet institucioneve evropiane, Kombeve të Bashkuara dhe qeverive të vendeve pjesëmarrëse që të ndërmarrin veprime urgjente për të siguruar mbrojtjen e civilëve në bord dhe respektimin e ligjit ndërkombëtar.

LETRA