Shtetet e Bashkuara njoftuan se armëpushimi mes Izraelit dhe Libanit do të zgjatet për 45 ditë, pas bisedimeve që Washingtoni i përshkroi si “shumë produktive” mes dy palëve.

“Ndërprerja e armiqësive e 16 prillit do të zgjatet për 45 ditë për të mundësuar përparim të mëtejshëm”, tha zëdhënësi i Departamentit të Shtetit, Tommy Pigott, në platformën sociale amerikane X.

On May 14 and 15, the United States hosted two days of highly-productive talks between Israel and Lebanon. The April 16 cessation of hostilities will be extended by 45 days to enable further progress. The State Department will reconvene the political track of negotiations on June… pic.twitter.com/Dcs9NJDdN5

— Tommy Pigott (@statedeptspox) May 15, 2026

Njoftimi erdhi pavarësisht sulmeve të vazhdueshme izraelite në Liban që nga hyrja në fuqi e armëpushimit të ndërmjetësuar nga SHBA-ja.

Pigott tha se Departamenti i Shtetit do të rifillojë raundin e negociatave politike më 2-3 qershor.

Ai gjithashtu njoftoi se një “linjë e veçantë sigurie” që përfshin delegacione ushtarake nga të dy vendet do të nisë në Pentagon më 29 maj.

“Shpresojmë që këto diskutime të avancojnë drejt paqes së qëndrueshme mes dy vendeve, njohjes së plotë të sovranitetit dhe integritetit territorial të njëra-tjetrës, si dhe krijimit të sigurisë së vërtetë përgjatë kufirit të përbashkët”, tha Pigott.

Njoftimi pasoi raundin e tretë të negociatave të ndërmjetësuara nga SHBA-ja, të mbajtura në Departamentin e Shtetit.

Një zëdhënës i Departamentit të Shtetit tha për Anadolu se bisedimet ishin “shumë pozitive, madje përtej pritjeve”.

Sipas një zyrtari të Departamentit të Shtetit, SHBA-ja u përfaqësua në bisedime nga këshilltari i Departamentit të Shtetit Michael Needham, ambasadori amerikan në Izrael Mike Huckabee dhe ambasadori amerikan në Liban Michel Issa.

Libani u përfaqësua nga ambasadorja Nada Hamadeh Moawad dhe i dërguari presidencial libanez Simon Karam, tha zyrtari./ AA.