10,000 persona evakuohen për shkak të zjarreve në jug të Francës

Rreth 10,000 njerëz janë evakuuar nga komunitetet e tyre për shkak të një zjarri që po përhapet në jug të Francës, thanë të hënën autoritetet rajonale.

Prefektura e rajonit Pyrenees-Orientales tha se evakuimet u zhvilluan në 26 komunitete në një varg malor në perëndim të qytetit të Perpignan.

Deri të hënën, zjarri kishte djegur 4,600 hektarë, i nxitur nga era, nxehtësia intensive dhe lagështia jashtëzakonisht e ulët e ajrit. Një zjarrfikës dhe një banor vendas u plagosën rëndë.

Prefektura u bëri thirrje njerëzve në rajonin e prekur që t’i mbanin rrugët plotësisht të lira për zjarrfikësit dhe të mos ktheheshin në shtëpitë e tyre për të marrë sendet personale. Do të merren masa për të reduktuar orarin e punës së punonjësve që nuk mund të shkojnë në punë.

Shërbimet hekurudhore rajonale janë ndërprerë dhe një tren që operonte në një itinerar malor ka pezulluar qarkullimin.

BE dërgon ndihmë

Komisioni Evropian tha se katër avionë nga Suedia dhe Qiproja do të mbërrijnë në zonat e prekura të Francës më vonë gjatë ditës së hënë për të ndihmuar në përpjekjet për shuarjen e zjarreve.

Sipas njoftimit, Franca kishte kërkuar ndihmë të dielën nëpërmjet mekanizmit të mbrojtjes civile të Bashkimit Evropian.

'Përballë këtyre zjarreve shkatërruese, Europa qëndron e bashkuar. Ne jemi të bashkuar në vendosmërinë tonë për të mbrojtur jetët, komunitetet, mjetet e jetesës dhe mjedisin tonë natyror', tha Komisionerja e BE-së për Menaxhimin e Krizave, Hadja Lahbib.

Zjarri prish Turin e Francës

Përhapja e flakëve ka shkaktuar ndryshime në fazën e tretë të Turit të Francës, e cila kalon nëpër rajonin e prekur të hënën dhe tani do të zhvillohet pa spektatorë dhe pa karvanin e reklamave.

Të gjitha shërbimet e emergjencës duhet të përqendrohen në shuarjen e zjarrit, tha prefektura. Ata që nuk i përmbahen kufizimeve përballen me gjobë.

Shërbimi kombëtar meteorologjik Météo France paralajmëroi për një rrezik të lartë zjarri në pjesë të mëdha të vendit. Niveli më i lartë i alarmit, i kuq, u vendos në shtatë departamente në juglindje, ndërsa një rrezik i lartë për zjarre pyjore ekziston në 41 departamente të tjera. Zjarre kanë shpërthyer edhe në rajone të tjera të Francës.

Zjarre të mëtejshme në pyje në Gadishullin Iberik

Portugalia dhe Spanja kanë përjetuar gjithashtu disa zjarre pyjore ditët e fundit.

Zjarrfikësit më në fund kanë arritur të vënë nën kontroll një zjarr veçanërisht shqetësues në Vouzela të Portugalisë, rreth 80 kilometra në juglindje të Portos, pas tre ditësh.

Për shkak të rrezikut të vazhdueshëm të rindezjes së zjarrit, më shumë se 1,100 zjarrfikës ishin ende të vendosur atje të hënën, të mbështetur nga pothuajse 400 automjete dhe tre avionë zjarrfikës.

Me rreth 13,000 hektarë tokë të shkatërruar, zjarri në Vouzela konsiderohet deri më tani si zjarri më i madh pyjor në Europë këtë vit./DPA News