Influencerë e TikTok-era në samitet e BE-së?

Bashkimi Evropian po përfshin gjithnjë e më shumë influencerë dhe krijues përmbajtjesh në komunikimin e tij institucional, ndërsa projekti i ri pilot i Këshillit të BE-së ka shkaktuar përçarje serioze mes diplomatëve dhe mediave tradicionale në Bruksel.

Sipas informacionit të publikuar nga Politico, Këshilli i BE-së planifikon t’u ofrojë akses të kufizuar influencerëve gjatë samiteve të Këshillit Evropian dhe takimeve ministrore në Bruksel dhe Luksemburg, duke nisur nga korriku. Bëhet fjalë për një program pilot njëvjeçar, i cili do t’u mundësojë krijuesve të përmbajtjes të marrin pjesë në aktivitete të caktuara mediatike në kuadër të takimeve të liderëve evropianë.

Megjithatë, influencerët nuk do të kenë të njëjtat të drejta si gazetarët e akredituar. Atyre do t’u lejohet qasja në konferenca për shtyp dhe në deklaratat hyrëse të liderëve pas mbërritjes në takime, por nuk do të kenë mundësi të bëjnë pyetje. Për më tepër, ata do të jenë nën shoqërim të vazhdueshëm dhe nuk do të mund të lëvizin lirshëm në ambientet e samiteve.

Dokumenti thekson se kjo ide nuk ka gjetur mbështetje unanime mes shteteve anëtare. Disa diplomatë kanë shprehur skepticizëm nëse influencerët mund të ndjekin dhe kuptojnë në mënyrë adekuate negociatat komplekse evropiane dhe procedurat institucionale. Një diplomat e përshkroi reagimin në takimin e ekspertëve si “të vakët”, ndërsa një tjetër u shpreh se “nuk e sheh se si një TikToker do ta kuptojë se çfarë është Këshilli Evropian”. Megjithatë, disa diplomatë evropianë besojnë se institucionet e BE-së duhet të gjejnë forma të reja për të komunikuar me audiencat më të reja.

Plani ka nxitur kritika edhe nga komuniteti gazetaresk në Bruksel. Presidenti i Shoqatës së Korrespondentëve të Huaj API, Dafydd ab Iago, paralajmëroi se influencerët nuk i nënshtrohen të njëjtave standarde profesionale dhe etike si gazetarët e akredituar. Ai ngriti veçanërisht shqetësime për transparencën e financimit dhe konfliktet e mundshme të interesit.

Në vitet e fundit, roli i influencerëve në politikën evropiane është bërë gjithnjë e më i dukshëm edhe përtej Këshillit të BE-së. Parlamenti Evropian tashmë bashkëpunon me disa krijues përmbajtjesh, ndërsa në Bruksel po zhvillohen diskutime të gjera mbi rregullimin e influencerëve, transparencën e postimeve të sponsorizuara dhe ndikimin e tyre politik.

Eurodeputeti gjerman Lucas Sieper, i cili vetë ka një prani të fortë në rrjetet sociale, ka deklaruar se dëshiron të organizojë një “Samit të Influencerëve” të veçantë në Parlamentin Evropian. Sipas tij, synimi është që politikanët evropianë të kuptojnë më mirë mënyrën se si funksionon komunikimi modern dixhital dhe “të ndalojnë së përdoruri influencerët vetëm si një mjet marketingu”.

Detajet e plota të projektit pilot të Këshillit të BE-së ende nuk janë prezantuar zyrtarisht.