Një zëdhënës i ministrisë së jashtme të Iranit ka thënë se marrëveshja e paqes me SHBA nuk do të nënshkruhet nesër. 

Esmaeil Baghaei ka thënë se Irani duhet të jetë i kujdesshëm në komentet mbi datën e nënshkrimit për shkak të hezitimit nga SHBA.

Komentet e tij vijnë mes spekulimeve në rritje nëse një marrëveshje fillestare mund të finalizohet këtë fundjavë.

Sipas raportimeve, presidenti amerikan, Donald Trump është i etur ta sigurojë marrëveshjen përpara se të udhëtojë për në Francë për një samit të G7 të hënën.

Më herët sot, kryeministri i Pakistanit tha se marrëveshja ishte “më afër se kurrë më parë”, me finalizimin që pritet të ndodhë në 24 orët e ardhshme.

Teherani dhe Uashingtoni janë përfshirë në negociata që prej 8 prillit, kur një armëpushim i dha fund fushatës së bombardimeve amerikano-izraelite kundër Iranit që kishin nisur më 28 shkurt.

Disa çështje të ndërlikuara e kanë penguar arritjen e një marrëveshjeje, përfshirë fatin e rezervave iraniane të uraniumit të pasuruar, luftën e vazhdueshme të Izraelit kundër Hezbollahut në Liban dhe kërkesën e Teheranit që Uashingtoni të lirojë fondet iraniane të ngrira jashtë vendit./