Strategjia e re/ Shtëpia e Bardhë e quan Evropën 'inkubator' për terrorizmin

Administrata e Presidentit të SHBA-së, Donald Trump, akuzoi Evropën se është një "inkubator" për terrorizmin e nxitur nga migrimi masiv, në një strategji të re kundër terrorizmit të zbuluar të mërkurën.

Strategjia përqendrohet gjithashtu në çrrënjosjen e "ekstremistëve të dhunshëm të krahut të majtë", përfshirë grupet "radikalisht pro-transgjinore", ndërsa administrata konservatore e Trumpit rrit sulmet e saj politike ndaj kundërshtarëve.

Më tej, kjo i vendos kartelet e drogës në Amerikë në qendër të përpjekjeve kundër terrorizmit.

Por një pjesë e gjuhës së saj më të fortë është e rezervuar për Evropën, shtëpi e shumë aleatëve të SHBA-së, të cilët do të alarmohen kur ta shohin kontinentin e tyre përsëri në shënjestrën e administratës Trump.

 “Është e qartë për të gjithë se grupet armiqësore të organizuara mirë, shfrytëzojnë kufijtë e hapur dhe idealet globaliste që lidhen me to. Sa më shumë të rriten këto kultura të huaja dhe sa më gjatë të vazhdojnë politikat aktuale evropiane, aq më shumë terrorizëm garantohet”, thuhej në strategji.

 “Si vendlindja e kulturës dhe vlerave perëndimore, Evropa duhet të veprojë tani dhe të ndalojë rënien e saj të qëllimshme”, thuhet në strategjinë e udhëhequr nga koordinatori i antiterrorizmit Sebastian Gorka, i cili është akuzuar për lidhje me grupet e ekstremit të djathtë.

Kritikat e reja ndaj Evropës vijnë vetëm disa muaj pasi strategjia e re e sigurisë kombëtare e Trump tha se kontinenti përballet me "fshirje të qytetërimit" për shkak të imigracionit.

Trump gjithashtu kohët e fundit ka sulmuar aleatët evropianë të NATO-s për dështimin për të ndihmuar në luftën e tij kundër Iranit.

Grupet e krahut të majtë janë një preokupim i madh për administratën e presidentit republikan, me strategjinë që synon ata që i quan "ekstremistë të dhunshëm të krahut të majtë, përfshirë anarkistët dhe antifashistët".

Aty thuhet se përpjekjet e SHBA-së kundër terrorizmit, "i japin përparësi identifikimit të shpejtë dhe neutralizimit të grupeve të dhunshme politike laike, ideologjia e të cilave është antiamerikane, radikalisht pro-transgjinore dhe anarkiste".

Aty përmendej konkretisht vrasësi i dyshuar i aleatit të Trump dhe ndikuesit konservator Charlie Kirk, "nga një radikal që përkrahte ideologji ekstreme transgjinore".

Që nga rikthimi i tij në pushtet vitin e kaluar, Trump ka demonizuar çdo njohje të diversitetit gjinor dhe personave transgjinorë.

Ai mburret rregullisht se si administrata e tij i ka ndaluar gratë transgjinore nga sportet e grave, dhe menjëherë pas inaugurimit të tij nënshkroi një urdhër ekzekutiv që shpallte se ekzistojnë vetëm dy gjini./ Euronews.