Krim i rëndë në Angli/ 16-vjeçarja vritet me thikë, tre të arrestuar

Një ngjarje e rëndë ka tronditur Leeds, ku 16-vjeçarja Chloe Watson ka ndërruar jetë pas një sulmi të dyshuar me thikë në rrugë, duke ngritur shqetësime të mëdha për sigurinë dhe dhunën mes të rinjve.

Adoleshentja u gjet pa ndjenja pas një feste me miq dhe u transportua me urgjencë në spital, por nuk arriti t’i mbijetonte plagëve të marra, pavarësisht përpjekjeve të mjekëve.

Autoritetet kanë ngritur akuza për vrasje ndaj tre personave: Kayla Smith, 18 vjeçe, Archie Rycroft, 19 vjeç dhe një djalë 17-vjeçar, identiteti i të cilit nuk bëhet publik për arsye ligjore.

Sipas ekzaminimit mjeko-ligjor, Chloe Watson humbi jetën si pasojë e një plage me thikë në kraharor, duke u klasifikuar si “vdekje e dhunshme”. Seanca paraprake është pezulluar deri në përfundimin e procesit penal.

Të dyshuarit pritet të paraqiten sërish në gjykatë më 1 maj në Leeds Crown Court për dëgjimin e aktakuzës dhe përgatitjen për gjyq, i cili paraprakisht është planifikuar të zgjasë tre javë në muajin nëntor.

Në një reagim prekës, nëna e 16-vjeçares e përshkroi të bijën si një “princeshë të bukur”, duke shprehur dhimbjen e thellë për humbjen dhe duke theksuar se nuk mund të jetojë pa të.