Skandal në Londër, policia që ruan kryebashkiakun Sadiq Khan harron jashtë banesës së tij çantën me armë

Një incident i paprecedent në Londër ka shqetësuar qytetarët dhe autoritetet britanike.

Policia e trupës së sigurisë së kryebashkiakut të Londrës, Sadiq Khan, la jashtë rezidencës së tij një çantë që përmbante një pushkë automatike MP5, një pistoletë Glock, një taser dhe fishekë.

Çantën e gjeti një kalimtar, Jordan Griffiths, i cili telefonoi menjëherë policinë. “Nuk po i besoja syve. Bëra foto për të dokumentuar gjetjen,” rrëfeu ai për The Sun.

“Telefonova policinë dhe u tregova çfarë kisha gjetur. Brenda pak minutash, ata erdhën për të marrë armët… Kur mbërritën, ishin gjithashtu të shokuar,” shtoi ai.

Ai tha se policia i tha se çanta ishte lënë aty nga njëri nga oficerët e sigurisë së Sadiq Khan. “Më dukej logjike, pasi ai jeton aty,” shtoi Griffiths.

Pesë policë janë pezulluar përkohësisht, ndërsa hetimet janë ende në zhvillim. Zëdhënësi i kryebashkiakut tha se incidenti konsiderohet shumë serioz dhe është referuar Drejtorisë për Standardet Profesionale të Policisë Metropolitane.

“Ky është një incident shumë serioz, i cili është referuar Drejtorisë për Standardet Profesionale të Policisë Metropolitane. Policia Metropolitane duhet tani të marrë të gjitha masat për të siguruar që një gjë e tillë të mos ndodhë më kurrë”, tha ai.