Kryqi i Kuq Holandez ngriti alarmin të martën se moti ekstrem i lidhur me afrimin e fenomenit El Niño, mund të kërcënojë sigurinë ushqimore dhe të rrezikojë të shkaktojë mungesë uji në të gjithë botën.

"Moti ekstrem gjithmonë godet njerëzit që kanë më pak të ardhura. ... Ata së shpejti do të goditen tre herë më shumë nga thatësira, përmbytjet ose nxehtësia ekstreme. Kjo vetëm sa rrit rrezikun e mungesës së ushqimit dhe sëmundjeve", tha Harm Goossens, drejtori i Kryqit të Kuq Holandez, në një deklaratë me shkrim.

Goossens vuri në dukje se thatësira mund të çojë në dështime të të korrave dhe në rritje të çmimeve të ushqimeve, ndërkohë që shkakton edhe pasiguri të rëndë ushqimore në Sudan, Sudanin e Jugut dhe Lindjen e Mesme.

“Duke ndërmarrë veprime më shpejt, ne parandalojmë shumë vuajtje dhe në fund të fundit, ndihma është më e lirë dhe më efektive”, tha ai më tej.

Goossens theksoi nevojën për të vepruar në kohë, për të parandaluar që moti ekstrem të përshkallëzohet në një katastrofë të madhe humanitare. "Fitimi më i madh qëndron në përgatitje", shtoi Goossens.

Organizata Botërore Meteorologjike paralajmëroi së fundmi se ekziston një shans prej 80% që El Niño të shfaqet gjatë periudhës qershor-gusht, me probabilitetin që ai të vazhdojë të paktën deri në nëntor duke arritur afër ose mbi 90%./ AA.