Rasti i parë europian i gripit të shpendëve raportohet në Itali. Çfarë duhet të dini

Rasti i parë njerëzor i virusit të gripit H9N2 (gripi i shpendëve) është raportuar në Europë. Infeksioni tek një person u regjistrua nga Ministria Italiane e Shëndetësisë me 25 mars 2026.

Çfarë dimë për këtë rast?

Pacienti u infektua jashtë Europës përpara se të udhëtonte drejt rajonit të Lombardisë në Italinë veriore. Këshilltari për mirëqenien në Lombardi, Guido Bertolaso, raportoi se pacienti është një djalë me probleme shëndetësore ekzistuese, i cili u diagnostikua pasi u kthye nga një vizitë në Afrikë.

Fatmirësisht, infeksioni nuk i ka shkaktuar gjendje të rëndë shëndetësore, por ai është vendosur në izolim spitalor në spitalin San Gerardo në Monza. Autoritetet italiane të shëndetit publik konfirmuan infeksionin me virusin H9N2 përmes analizave laboratorike që zbulojnë materialin gjenetik të virusit.

Çfarë është virusi i gripit H9N2?

Viruset H9N2 bëjnë pjesë në grupin e viruseve të gripit A. Ky grup i madh përfshin edhe dy viruset që shkaktojnë gripin sezonal te njerëzit (H1N1 dhe H3N2), si dhe shumë viruse të tjera që infektojnë shpendët.

Viruset H9N2 klasifikohen si “viruse të gripit të shpendëve me patogjenitet të ulët”. Termi “patogjenitet i ulët” i referohet aftësisë së tyre për të shkaktuar sëmundje te shpendët (gripi i shpendëve është një kërcënim i madh për industrinë e shpendarisë), por tek njerëzit zakonisht shkakton vetëm simptoma të lehta.

H9N2 nuk është i përshtatur mirë për të infektuar njerëzit dhe, kur kjo ndodh, zakonisht lidhet me kontakt të drejtpërdrejtë me shpendë në mjedise shumë të kontaminuara. Edhe pse ky është rasti i parë njerëzor në Europë, qindra raste të infektimit me H9N2 janë regjistruar më parë, kryesisht në Kinë, por edhe në vende të tjera të Azisë dhe Afrikës.

Cili është niveli i rrezikut për njerëzit?

Shpresohet që pacienti i infektuar të shërohet plotësisht. Aktualisht, rreziku për popullatën e gjerë është shumë i ulët.

Pse? Virologët analizojnë disa faktorë për të vlerësuar nëse një infeksion i izoluar tek njeriu nga një virus shtazor mund të përhapet më gjerësisht, në rastin më të keq, duke shkaktuar pandemi, gjë që viruset e gripit të shpendëve e kanë bërë edhe më parë. Ky rast i H9N2 aktualisht nuk tregon shenja të tilla.

Dihet se ky variant i virusit do të duhej të pësonte mutacione për t’u përshtatur mirë me infektimin e njerëzve. Si masë paraprake, autoritetet italiane kanë gjurmuar kontaktet e pacientit për të verifikuar nëse ka pasur përhapje të mëtejshme. Deri tani, duket shumë e pamundur që rasti të shkojë më tej.

Tabloja më e gjerë

Megjithatë, ekziston një tablo më e gjerë. Ka shumë viruse gripi që janë më shqetësues sesa H9N2. Më problematik është shpërthimi global në vazhdim i virusit të gripit të shpendëve H5N1, i cili është shumë më patogjen dhe po tregon një prirje shqetësuese për të infektuar gjitarët.

Një rast i izoluar i H9N2 në Europë mund të mos përbëjë një problem të madh në vetvete, por është një kujtesë se duhet të mbetemi vigjilentë dhe të monitorojmë vazhdimisht sjelljen e paparashikueshme të viruseve të gripit të shpendëve. /TheConversation – Syri.net