Rrëshqitje dheu dhe përmbytje në Afrikën Lindore, 20 të vdekur

Të paktën 20 persona kanë humbur jetën në rrëshqitjet e dheut të shkaktuara nga shirat e rrëmbyeshëm në Tanzaninë jugore gjatë ditëve të fundit.

Shiu dhe erërat e forta shkaktuan rrëshqitje dheu që shkatërruan shtëpi në rajonin Mbeya të mërkurën në mëngjes, tha Jafar Haniu, administrator i distriktit Rungwe ku ndodhën rrëshqitjet e dheut.

"Numri i të vdekurve tani është 20. Një viktimë është një fëmijë shumë i vogël, një vjeç e gjysmë", tha Haniu.

Ai deklaroi se meteorologët parashikojnë më shumë reshje shiu në ditët në vijim dhe u bëri thirrje banorëve të zonave të prirura për rrëshqitje toke që të evakuohen.

Në Kenian fqinje, e cila goditet nga përmbytjet sezonale çdo vit, të paktën 88 persona kanë vdekur. Përmbytjet kanë prekur 21 distrikte dhe të paktën dy lumenj kanë dalë nga shtrati që kur filluan shirat e rrëmbyeshëm në fillim të këtij muaji. Ushtria është vendosur për të ndihmuar shërbimet e emergjencës në përpjekjet e shpëtimit.

Në Etiopinë jugore, të paktën 80 persona humbën jetën nga rrëshqitjet e dheut në fillim të marsit.

Muajin e kaluar, Qendra Rajonale e Parashikimit të Klimës tha se sezoni i shirave nga marsi deri në maj ka një shans prej 45 për qind për reshje mbi mesataren në shumicën e vendeve të rajonit, duke përfshirë vendet nga Uganda në Xhibuti.