Tregtia transatlantike e skllevërve, OKB: Krimi më i rëndë kundër njerëzimit!

Asambleja e Përgjithshme e Kombeve të Bashkuara e ka klasifikuar tregtinë transatlantike të skllevërve si "krimin më të rëndë kundër njerëzimit", duke miratuar një rezolutë që bën thirrje gjithashtu për kthimin e objekteve kulturore në vendet e tyre të origjinës.

Masa, e prezantuar nga Gana, u mbështet nga 123 vende, ndërsa Izraeli, Shtetet e Bashkuara dhe Argjentina votuan kundër saj. Gjermania abstenoi. Rezolutat e Asamblesë së Përgjithshme nuk janë ligjërisht të detyrueshme.

Teksti thotë se skllavërimi i afrikanëve dhe tregtia transatlantike e skllevërve duhet të konsiderohet, si "krimi më i rëndë kundër njerëzimit" për shkak të shkallës, kohëzgjatjes, natyrës sistemike, brutalitetit dhe pasojave afatgjata të krimeve.

Një përfaqësues i SHBA-së e kritikoi rezolutën si problematike, duke thënë se Kombet e Bashkuara nuk ishin themeluar për të çuar përpara agjenda specifike ose për të promovuar, ato që ai i përshkroi si festime ndërkombëtare specifike.

Votimi përkoi me Ditën Ndërkombëtare të Përkujtimit të Viktimave të Skllavërisë dhe Tregtisë Transatlantike të Skllevërve.

Midis shekujve 16 dhe 19, miliona afrikanë u skllavëruan dhe u transportuan nga kolonialistët evropianë në Amerikë dhe Karaibe, shumë prej të cilëve vdiqën gjatë udhëtimit.

Britania e hoqi tregtinë e skllevërve në vitin 1807, ndërsa skllavëria u ndalua zyrtarisht në të gjithë Shtetet e Bashkuara në vitin 1865.

Kombet e Bashkuara e nxorën jashtë ligjit skllavërinë në nivel global me miratimin e Deklaratës Universale të të Drejtave të Njeriut në vitin 1948./ DPA News.