Meloni në kërkim të gazit në Algjeri

Kryeministrja italiane Giorgia Meloni po zhvillon një vizitë zyrtare në Algjeri, ku pritet të takohet me presidentin Abdelmadjid Tebboune, në përpjekje për të siguruar furnizime alternative me gaz natyror, në një moment kur tregjet globale të energjisë po përballen me tronditje të forta.

Sipas Financial Times, lëvizja vjen pas ndërprerjeve serioze në furnizim, të shkaktuara nga përshkallëzimi i konfliktit në Lindjen e Mesme. Katari, i cili mbulonte rreth 33% të importeve italiane të gazit të lëngshëm (LNG) në vitin 2025, shpalli “force majeure” në kontratat afatgjata pas goditjeve të Irani ndaj kompleksit kryesor të LNG-së në Ras Laffan.

Aktualisht, Algjeria është furnizuesi kryesor i gazit për Italinë, kryesisht përmes gazsjellësit Trans-Mesdhetar. Në vitin 2025, vendi afrikano-verior mbuloi rreth 36% të importeve totale të gazit italian dhe rreth 10% të LNG-së.

Vizita e Melonit synon të sigurojë rritje të këtyre furnizimeve për të kompensuar mungesat nga Katari. Megjithatë, ekspertët paralajmërojnë se kapacitetet shtesë të Algjerisë janë të kufizuara, pasi vendi konsumon rreth gjysmën e prodhimit të vet dhe kërkesa e brendshme është në rritje.

Italia është ndër ekonomitë më të ekspozuara në Europë ndaj luhatjeve të çmimeve të gazit. Rreth 44% e energjisë elektrike në vend prodhohet nga termocentrale me gaz, shumë më tepër se mesatarja e Bashkimit Europian prej rreth 17%.

Rritja e çmimeve globale të energjisë, e përshpejtuar nga tensionet gjeopolitike, po shton presionin mbi industrinë italiane, e cila tashmë përballej me kosto të larta edhe para krizës së fundit.

Analistët theksojnë se kjo vizitë i jep Melonit mundësinë të tregojë angazhim për zgjidhjen e krizës energjetike dhe për të qetësuar opinionin publik, i cili është gjithnjë e më i shqetësuar për faturat e energjisë.