Zbulim tronditës në Kenia/ Dhjetëra trupa, shumica foshnje, gjenden në varr masiv në Kericho

Një ngjarje e rëndë ka tronditur opinionin publik në Kenia, pasi rreth 32 trupa, shumica prej tyre fëmijë dhe foshnje janë zhvarrosur nga një varr masiv në qytetin perëndimor të Kericho-s. Zbulimi ka ngritur shqetësime të mëdha dhe ka nxitur hetime të thelluara nga autoritetet.

Fillimisht, policia kishte marrë një urdhër gjykate për të zhvarrosur 14 trupa, që besohej se ndodheshin në vendngjarje. Megjithatë, gjatë procesit të gjatë të zhvarrosjes, i cili u ndërpre edhe nga reshjet e dendura të shiut, u zbuluan shumë më tepër mbetje njerëzore sesa pritej.

Zyrtari qeveritar, Richard Njoroge, deklaroi se situata ishte “shumë e pazakontë”, duke shtuar se trupat ishin “të grumbulluar në thasë” në kushte që ngjallin dyshime serioze. Sipas tij, nga trupat e gjetur, shtatë janë të të rriturve, ndërsa 25 janë fëmijë, përfshirë foshnje dhe fetusë. Gjithashtu janë gjetur edhe pjesë të ndara trupore.

Ekspertët kanë vërejtur se trupat e të rriturve janë në gjendje më të avancuar dekompozimi krahasuar me ato të fëmijëve, çka sugjeron se vdekjet kanë ndodhur në periudha të ndryshme kohore. Autopsitë pritet të fillojnë menjëherë për të përcaktuar shkaqet e vdekjes dhe për të identifikuar viktimat.

Sipas hetimeve paraprake nga Drejtoria e Hetimeve Penale (DCI), 13 trupa të paidentifikuar ishin liruar zyrtarisht nga një spital në qarkun fqinj Nyamira County dhe ishin transportuar drejt Kericho-s për varrim. Megjithatë, mbetet e paqartë origjina e trupave të tjerë dhe mënyra sesi janë varrosur në mënyrë të fshehtë.

Terreni ku u gjetën trupat i përket Këshillit Kombëtar të Kishës Keniane, që ka mohuar çdo lidhje me këtë varrim. Një përfaqësues i organizatës deklaroi se varrimi ishte kryer pa dijeninë dhe miratimin e tyre, duke i zënë në befasi.

Autoritetet kanë arrestuar tashmë dy persona, një zyrtar të shëndetit publik nga Nyamira dhe një kujdestar varrezas,  ndërsa disa të tjerë po merren në pyetje. Hetimet po shqyrtojnë nëse kemi të bëjmë me veprimtari kriminale përtej parregullsive administrative në procesin e varrimit.

Organizatat për të drejtat e njeriut kanë reaguar ashpër. Grupi Zëri Afrikan e cilësoi zbulimin si një “përshkallëzim tronditës dhe të tmerrshëm”, që tregon përmasat reale të tragjedisë. Ata kërkuan transparencë të plotë dhe përgjegjësi kombëtare, duke theksuar raportimet për gjymtime dhe shpërbërje trupash.

Ndërkohë, Faith Odhiambo, presidente në largim e Shoqatës së Juristëve të Kenias, bëri thirrje për identifikimin sa më të shpejtë të viktimave dhe zbardhjen e plotë të ngjarjes.

Ky rast rikthen në vëmendje një tjetër tragjedi të rëndë në vend, atë të vitit 2023 pranë qytetit bregdetar Malindi, ku mbi 429 trupa u zbuluan në pyllin Shakahola. Në atë rast, predikuesi Paul Mackenzie u arrestua nën akuzat se kishte urdhëruar ndjekësit e tij të vdisnin nga uria, akuza që ai i ka mohuar.