Kalimet e paligjshme përgjatë kufirit SHBA-Meksikë në vitin fiskal 2025 ranë në nivelin më të ulët vjetor që nga fillimi i viteve 1970, mes masave të ashpra të administratës Trump kundër imigracionit të paligjshëm, tregojnë statistikat e brendshme federale të marra nga CBS News.

Agjentët e Patrullës Kufitare të SHBA-së regjistruan gati 238,000 kapje të migrantëve që kalonin kufirin jugor në mënyrë të paligjshme në vitin fiskal 2025, i cili filloi në tetor të vitit të kaluar dhe përfundoi më 30 shtator, sipas të dhënave paraprake të Departamentit të Sigurisë Kombëtare, të cilat nuk janë raportuar më parë.

Shifrat historike tregojnë se ky është numri më i ulët vjetor i regjistruar nga Patrulla Kufitare që nga viti fiskal 1970, kur agjencia raportoi afërsisht 202,000 arrestime përgjatë kufirit SHBA-Meksikë .

Gjithashtu, kjo përfaqëson një ndryshim sizmik nga nivelet rekord të arrestimeve të Patrullës Kufitare të regjistruara gjatë administratës Biden, e cila u përball me një krizë humanitare të paparë në kufirin SHBA-Meksikë. Në vitin fiskal 2022 , Patrulla Kufitare bëri 2.2 milionë arrestime atje - një rekord dhe pothuajse 10 herë më shumë se nivelet e regjistruara në vitin 2025.

Më shumë se 60% e arrestimeve të bëra nga Patrulla Kufitare në vitin fiskal 2025 përgjatë kufirit SHBA-Meksikë, u regjistruan në tre muajt e fundit të plotë të administratës Biden, tregojnë të dhënat paraprake. Vitet fiskale qeveritare fillojnë në tetor dhe përfundojnë në shtator, dhe disa prej tyre përfshijnë administrata të ndryshme.

Gjatë tetë muajve të parë të plotë në detyrë të Presidentit Trump, agjentët e Patrullës Kufitare të caktuar në kufirin jugor kanë regjistruar më pak se 9,000 arrestime çdo muaj - një numër që agjencia e regjistroi në periudha 24-orëshe gjatë disa ditëve nën drejtimin e ish-Presidentit Joe Biden.

Shifrat e brendshme të DHS tregojnë se Patrulla Kufitare bëri gati 8,400 arrestime në kufirin SHBA-Meksikë në shtator, një rritje nga 6,300 në gusht dhe 4,600 në korrik, një shifër rekord mujore.

Arrestimet e Patrullës Kufitare tregojnë numrin e herëve që agjentët kanë kapur dhe përpunuar migrantët që hyjnë në vend midis porteve zyrtare të hyrjes, gjë që është e paligjshme. Disa migrantë mund të numërohen disa herë, nëse përpiqen të hyjnë në SHBA më shumë se një herë pasi janë kthyer në Meksikë.

Në një deklaratë, zëdhënësja e Shtëpisë së Bardhë, Abigail Jackson, tha: “Presidenti Trump e ka përmbushur në mënyrë dërrmuese premtimin e tij për të siguruar kufirin tonë jugor.”

"Si rezultat, amerikanët janë më të sigurt - emigrantët e paligjshëm kriminelë të paverifikuar dhe drogat e rrezikshme, nuk po vërshojnë më kufirin tonë të pakontrolluar", shtoi Jackson. "Dhe për të gjithë demokratët që pretendonin se ishte e pamundur të sigurohej kufiri ose se kishin nevojë për politika të reja, rezulton se e tëra që na duhej ishte një President i ri."

"Një normalitet i ri"

Ariel Ruiz Soto, një analist në Institutin e Politikave të Migracionit, një grup mendimtarësh jopartiakë me seli në Uashington, vuri në dukje se kalimet e paligjshme të kufirit filluan të bien ndjeshëm në verën e vitit 2024, pasi administrata Biden miratoi kufizime të rrepta për azilin. Por ai tha se administrata Trump kishte vendosur "një normalitet të ri" për flukset e migracionit vetëm në pak muaj.

Ruiz Soto tha se politikat e rrepta të administratës Trump — në kufi dhe brenda SHBA-së — “kanë pasur një efekt të rëndësishëm në pengimin e njerëzve për të ardhur ilegalisht në Shtetet e Bashkuara”. 

Menjëherë pasi zoti Trump mori detyrën për herë të dytë, administrata e tij ndërmori hapa për të mbyllur dhe militarizuar kufirin jugor, duke mbyllur sistemin amerikan të azilit duke përdorur fuqitë e emergjencës,duke dërguar mijëra ushtarë për të sprapsur kalimet e paligjshme dhe duke mbyllur programet e epokës së Bidenit, që u lejonin disa migrantëve të hynin ligjërisht në SHBA.

Ndërsa pjesë të ndalimit të azilit janë kufizuar dhe shpallur të paligjshme nga gjykatat, administrata Trump praktikisht i ka dhënë fund praktikës së lirimit të migrantëve që kalojnë në SHBA ilegalisht, duke i deportuar ata shpejt ose duke i mbajtur në paraburgim ndërsa shqyrtohen rastet e tyre. 

Përtej kufirit, administrata Trump ka organizuar operacione shumë të publikuara, që synojnë ata që jetojnë ilegalisht në SHBA, duke dërguar ekipe oficerësh të Imigracionit dhe Doganave dhe agjentë të Patrullës Kufitare në të gjithë vendin me objektivin e mbikëqyrjes së një fushate deportimi me përmasa të papara. 

Masat e ashpra nuk kanë kaluar pa polemika. Politikat kufitare të administratës janë denoncuar si çnjerëzore, drakoniane dhe të paligjshme nga grupe si Unioni Amerikan i Lirive Civile, i cili i ka kundërshtuar ato në gjykatën federale me arsyetimin se ato janë në kundërshtim me ligjin amerikan dhe ndërkombëtar të azilit, si dhe me Kushtetutën.

Bastisjet federale të imigracionit përtej kufirit kanë shkaktuar gjithashtu reagime të forta, veçanërisht në qytetet e mëdha amerikane si Çikago dhe Los Anxhelos, ku kanë shpërthyer protesta në shkallë të gjerë. Demokratët kombëtarë dhe lokalë i kanë cilësuar bastisjet si të padrejta dhe tepër të ashpra, duke akuzuar administratën Trump se nuk është përqendruar vetëm në deportimin e shkelësve të dhunshëm.

Duke përmendur konfrontime dhe raste dhune, zoti Trump ditët e fundit ka urdhëruar trupat e Gardës Kombëtare të vendosen në Çikago dhe Portland, Oregon, për të mbrojtur agjentët dhe objektet e imigracionit atje. Një gjykatës federal deri më tani ka bllokuar planin për të dërguar njësi të Gardës Kombëtare në Portland.  

Mes debatit kombëtar mbi zbatimin e ligjit për imigracionin, ata që jetojnë përgjatë kufirit jugor thonë se nuk mund të mohohet se realiteti në terren ka ndryshuar dukshëm.

John Martin tha se rrjeti i tij i strehimoreve në qytetin kufitar të Teksasit, El Paso, strehoi qindra migrantë gjatë rritjes së kalimeve të paligjshme gjatë administratës së Biden. Të hënën, ai tha se organizata e tij nuk po strehonte asnjë migrant, duke thënë se ka pritur "pak ose aspak" të sapoardhur që nuk janë banorë vendas të pastrehë në muajt e fundit. Ai ia atribuoi këtë masave të ashpra të ndërmarra nga zoti Trump.

"Nëse qëllimi është të ulet numri i individëve, do të thoja se kjo duket se ka qenë e suksesshme, pa u futur në politikë nëse më pëlqen apo jo", tha Martin. "Thjesht nuk po i shohim njerëzit."/ CBS News.