Hamasi ka dorëzuar listën me emrat e pengjeve izraelite dhe të burgosurve palestinezë që do të përfshihen në një marrëveshje shkëmbimi, ndërsa në Egjipt vijojnë bisedimet për t’i dhënë fund luftës në Gaza.

Grupi militant palestinez konfirmoi se ka shkëmbyer listat për një marrëveshje të mundshme dhe shpreh optimizëm mbi ecurinë e negociatave që po mbahen në qytetin egjiptian Sharm el-Sheikh.

Në tryezën e bisedimeve, ku janë të pranishëm zyrtarë të lartë ndërkombëtarë të politikës dhe inteligjencës, diskutohet për një armëpushim të qëndrueshëm, tërheqjen e forcave izraelite nga Gaza, si dhe mekanizmat për lirimin e pengjeve dhe të burgosurve.

Sipas burimeve palestineze, një nga pikat më të ndjeshme në negociata është kërkesa për çarmatosjen e Hamasit diçka që grupi refuzon ta marrë në konsideratë pa u krijuar një shtet palestinez i pavarur.

Ish-presidenti amerikan Donald Trump ka dalë me një plan 20-pikësh për zgjidhjen e konfliktit në Gaza, dhe ka dërguar ekipin e tij në Egjipt, përfshirë Jared Kushner dhe Steve Witkoff.

Trump ka propozuar që pas përfundimit të luftës, Gaza të administrohet nga një trup ndërkombëtar të cilin ai do ta drejtojë vetë, me përfshirjen edhe të ish-kryeministrit britanik Tony Blair.

Në negociata janë përfshirë gjithashtu ministri izraelit Ron Dermer, kryeministri i Katarit Sheikh Mohammed bin Abdulrahman al-Thani, si dhe shefi i inteligjencës turke, Ibrahim Kalin, duke i dhënë Turqisë një rol gjithnjë e më të rëndësishëm si ndërmjetës.

Presidenti turk Tayyip Erdogan deklaroi se Trump i ka kërkuar Ankarasë të ndihmojë në bindjen e Hamasit për të mbështetur planin, dhe se Turqia është e gatshme të kontribuojë në garantimin e sigurisë dhe rindërtimin e Gazës pas luftës.

Ndërkohë që ende nuk është arritur një armëpushim, forcat izraelite kanë intensifikuar ofensivën në Gaza, çka ka shtuar më tej izolimin ndërkombëtar të Izraelit dhe ka përshkallëzuar krizën humanitare.

Sulmi izraelit erdhi pas ngjarjeve të 7 tetorit 2023, kur Hamasi vrau 1,200 persona dhe rrëmbeu 251 pengje sipas shifrave zyrtare izraelite.

Organizata të të drejtave të njeriut dhe një hetim i Kombeve të Bashkuara kanë ngritur shqetësime se ofensiva izraelite mund të përbëjë gjenocid, ndërsa Izraeli këmbëngul se po vepron në mbrojtje të vetvetes.