Britania paralajmëron Izraelin të mos hakmerret, ndërsa Franca përgatitet të njohë shtetin palestinez

Londër/Paris – Mbretëria e Bashkuar i ka bërë thirrje Izraelit të mos ndërmarrë hapa hakmarrës pas vendimit për njohjen e shtetit palestinez mga Britania e Madhe. Ndërkohë, Franca pritet të bëhet një nga vendet e radhës evropiane që do ta njohë zyrtarisht Palestinën.

Sekretarja e Jashtme britanike, Yvette Cooper, tha se ka paralajmëruar Izraelin të mos ndërmarrë aneksime të reja në Bregun Perëndimor si reagim ndaj këtij zhvillimi.

Njëkohësisht, Franca dhe disa shtete të tjera evropiane po përgatiten t’i bashkohen Mbretërisë së Bashkuar, Kanadasë dhe Australisë në njohjen e shtetit palestinez.

Kryeministri izraelit, Benjamin Netanyahu, e cilësoi këtë hap si “shpërblim për terrorizmin”.

Macron: Njohja është e vetmja rrugë politike

Presidenti francez, Emmanuel Macron, deklaroi se “njohja e shtetit palestinez është e vetmja mënyrë për të ofruar një zgjidhje politike për një situatë që duhet të marrë fund”.

Në një intervistë për CBS News, ai theksoi se ky është vetëm fillimi i një procesi politik dhe se pas njohjes pret të arrihet armëpushim, lirimi i pengjeve dhe rikthimi i ndihmës humanitare në Gaza.

Macron shtoi se qëndrimi i tij nuk është antisemit dhe kritikoi si “të papranueshme” akuzat e ambasadorit amerikan në Paris, Charles Kushner, se Franca nuk po bën mjaftueshëm për të luftuar antisemitizmin.

Barrot: Një ditë e madhe për paqen

Ministri i Jashtëm francez, Jean-Noel Barrot, e përshkroi ditën e sotme si “të madhe për paqen”, duke theksuar se vendimi i Francës është “një fitore diplomatike” dhe një sinjal i qartë për mbështetjen e zgjidhjes me dy shtete.

Ai tha se njohja e shtetit palestinez është “një mohim i qartë i Hamasit” dhe se ndihmon për të forcuar ata palestinezë që kanë zgjedhur rrugën paqësore.

Kush e njeh shtetin palestinez?

Deri më tani, mbi tri të katërtat e 193 vendeve anëtare të OKB-së e kanë njohur Palestinën. Të dielën, Britania, Australia, Kanadaja dhe Portugalia e shpallën njohjen zyrtare.

Sot pritet që Franca, Belgjika, Luksemburgu, Andorra, San Marino dhe Malta t’i bashkohen kësaj liste, gjatë një konference të OKB-së të organizuar nga Macron dhe Princi i Kurorës së Arabisë Saudite, Mohammed bin Salman.

Nga vendet që nuk e njohin ende Palestinën përfshihen SHBA-ja, Izraeli, Italia dhe Gjermania. Kryeministri i Zelandës së Re, Christopher Luxon, tha se qeveria e tij është duke e shqyrtuar çështjen, por vendimi do të bëhet publik më vonë këtë javë.

Konsensus politik në Izrael

Pavarësisht ndasive të brendshme politike, klasa politike izraelite është pothuajse unanime në kundërshtimin e njohjes së shtetit palestinez.

Edhe kritikë të qeverisë, si Yair Golan, e quajnë idenë “shkatërruese”. Lideri i opozitës, Yair Lapid, e përshkroi vendimin e Britanisë, Kanadasë dhe Australisë si “katastrofë diplomatike”, duke reflektuar unitetin e brendshëm izraelit kundër këtij hapi.