Abbasi mirëpret njohjen e Palestinës nga Mbretëria e Bashkuar, si 'hap të rëndësishëm' drejt paqes

Presidenti i Autoritetit Palestinez, Mahmoud Abbas, tha se njohja e shtetit palestinez nga Britania është një hap i nevojshëm drejt paqes së qëndrueshme në rajon.

“Shkëlqesia e tij vlerësoi njohjen e shtetit të pavarur të Palestinës nga Mbretëria e Bashkuar, duke pohuar se kjo përbën një hap të rëndësishëm dhe të nevojshëm drejt arritjes së një paqeje të drejtë dhe të qëndrueshme, në përputhje me legjitimitetin ndërkombëtar”, thuhet në një deklaratë të zyrës së Abbasit.

Edhe ministri i Jashtëm palestinez, Varsen Aghabekian Shahin tha se vendet që njohin një shtet palestinez këtë javë po ndërmarrin një hap të pakthyeshëm, që ruan zgjidhjen me dy shtete dhe e afron pavarësinë dhe sovranitetin palestinez.

Britania, Kanadaja dhe Australia njohën zyrtarisht shtetin palestinez të dielën, duke iu bashkuar kombeve të tjera në një lëvizje që synon të ringjallë vrullin për një zgjidhje me dy shtete, por që është kritikuar nga Izraeli dhe Shtetet e Bashkuara.

"Tani është koha. Nesër është një datë historike mbi të cilën duhet të ndërtojmë. Nuk është fundi", u tha Shahin gazetarëve në Ramallah.

"Është një veprim që na sjell më afër sovranitetit dhe pavarësisë. Mund të mos e përfundojë luftën nesër, por është një hap përpara, mbi të cilin duhet të ndërtojmë dhe ta përforcojmë", tha ajo, duke iu referuar fushatës ushtarake gati dyvjeçare të Izraelit në Gaza.

Franca dhe Arabia Saudite kanë udhëhequr përpjekjet për të ringjallur vrullin për zgjidhjen me dy shtete, me disa vende që njohin një shtet palestinez këtë javë në Asamblenë e Përgjithshme të Kombeve të Bashkuara në Nju Jork./ Reuters.