Rutte: Shkelja ajrore e Rusisë mbi Poloninë është 'sjellje e papërgjegjshme' – NATO në solidaritet të plotë me Varshavën

Sekretari i Përgjithshëm i NATO-s, Mark Rutte, ka reaguar ashpër ndaj shkeljes së hapësirës ajrore të Polonisë nga dronë rusë, duke e cilësuar si një akt "tërësisht të papërgjegjshëm", pavarësisht nëse ka qenë i qëllimshëm apo jo.

Në një deklaratë zyrtare, Rutte theksoi se aleatët e NATO-s kanë shprehur solidaritet të plotë me Poloninë, ndërsa vlerësimi i plotë i incidentit është ende në proces.

Sipas tij, në operacionin për rrëzimin e dronëve rusë morën pjesë disa vende anëtare të NATO-s, përfshirë Holandën, Italinë, Poloninë dhe Gjermaninë.

Ky incident vjen në një periudhë tensioni të lartë ndërmjet NATO-s dhe Rusisë, me Poloninë që prej muajsh ka rritur gatishmërinë ushtarake përgjatë kufirit lindor.

Në një reagim të parë të shkurtër, zëdhënësi i Kremlinit, Dmitry Peskov, gjatë konferencës së tij të përditshme me gazetarët, tha se Moska nuk do të komentojë mbi incidentin në hapësirën ajrore të Polonisë.

“Kjo nuk është çështje për ne. Është një çështje që i përket Ministrisë së Mbrojtjes,” tha Peskov, duke shmangur çdo përgjigje konkrete.

I pyetur për akuzat e drejtuara ndaj Rusisë nga BE dhe NATO, Peskov shtoi:
“Udhëheqësit e BE-së dhe NATO-s e akuzojnë Rusinë për provokime çdo ditë, zakonisht pa ndonjë provë.”