Republika Çeke, Rumania dhe Hungaria shkatërrojnë rrjetin e spiunëve të Bjellorusisë në Evropë

Agjencia e kundërzbulimit e Republikës Çeke (BIS) njoftoi të hënën se ka shkatërruar një rrjet spiunazhi të ngritur nga Bjellorusia në disa vende evropiane, në një operacion të përbashkët me shërbimet e inteligjencës së Hungarisë dhe Rumanisë.

Sipas BIS, agjentë të KGB-së bjelloruse u vunë re në disa vende, ndër të cilët edhe një ish-zëvendësdrejtor i shërbimit të inteligjencës moldave SIS, i cili kishte dorëzuar informacione të klasifikuara KGB-së. Një agjent tjetër bjellorus, që vepronte nën maskën e diplomatit, u dëbua nga Çekia dhe iu dha 72 orë për t’u larguar nga vendi.

Agjencia çeke theksoi se Bjellorusia arriti të krijojë rrjetin për shkak të lirisë së lëvizjes së diplomatëve të saj në vendet e Bashkimit Evropian. Kreu i BIS, Michal Koudelka, deklaroi: “Për t’iu kundërvënë me sukses këtyre aktiviteteve armiqësore në Evropë, ne duhet të kufizojmë lëvizjen e diplomatëve të akredituar nga Rusia dhe Bjellorusia brenda zonës Shengen.”

Hetimi ndërkombëtar vazhdon dhe mbikëqyret nga agjencia e bashkëpunimit gjyqësor të Bashkimit Evropian, Eurojust. Bjellorusia, nën drejtimin e Presidentit Aleksandr Lukashenka, është aleate e ngushtë e Rusisë dhe ka lejuar përdorimin e territorit të saj nga Moska gjatë pushtimit të Ukrainës në 2022, si dhe vendosjen e raketave bërthamore taktike ruse.