‘Ne po mbështetemi në një përgjigje të fortë të SHBA-së’/ Zelensky reagon pas sulmit rus mbi Ukrainë

Presidenti i Ukrainës, Volodymyr Zelensky tha se priste një “përgjigje të fortë” nga Shtetet e Bashkuara pas sulmit masiv ajror rus që goditi Ukrainën mbrëmjen e djeshme.

Në reagimin e tij, Zelensky theksoi se ‘është e rëndësishme që partnerët t’i përgjigjen në mënyrë gjithëpërfshirëse këtij sulmi. Ne po mbështetemi në një përgjigje të fortë nga Shtetet e Bashkuara’.

Ndërkohë, Ukraina pretendon se ka sulmuar përsëri tubacionin Druzhba në rajonin e Bryansk të Rusisë, i cili furnizon gjithashtu naftë ruse në Hungari dhe Sllovaki, duke shkaktuar “dëme të gjera për shkak të zjarrit”.

Komandanti i forcave ukrainase të dronëve, Robert Brovdi, pretendon se është goditur tubacioni që furnizon me naftë bruto në Budapest dhe Bratislavë, të cilat vazhdojnë të blejnë energji nga Rusia edhe pse BE vendosi të ndërpresë rrjedhat.

Pretendimi i Brovdi-t, nuk është verifikuar në mënyrë të pavarur dhe Rusia nuk ka komentuar mbi sulmin, por i është referuar asaj që e quan një sulm të veçantë në rafinerinë e naftës Ilsky në Krasnodar./ Sky News/