Gjykata Supreme kundër Netanyahut: Qeveria s’po u jep ushqim të mjaftueshëm të burgosurve palestinezë!

Gjykata supreme e Izraelit ka vendosur se qeveria nuk ka arritur t'u sigurojë të burgosurve palestinezë ushqim të mjaftueshëm për jetesën bazë, dhe ka urdhëruar autoritetet të përmirësojnë ushqyerjen e tyre.

Vendimi i së dielës ishte një rast i rrallë në të cilin gjykata më e lartë e vendit vendosi kundër sjelljes së qeverisë gjatë luftës gati dyvjeçare.

Që nga fillimi i luftës, Izraeli ka kapur mijëra njerëz në Gaza që dyshon se kanë lidhje me Hamasin. Mijëra janë liruar gjithashtu pa akuza, shpesh pas muajsh paraburgimi.

Grupet e të drejtave të njeriut kanë dokumentuar abuzime të përhapura në burgje dhe qendra paraburgimi, duke përfshirë ushqim dhe kujdes shëndetësor të pamjaftueshëm, si dhe kushte të dobëta sanitare dhe rrahje. Në mars, një djalë 17-vjeçar palestinez vdiq në një burg izraelit dhe mjekët thanë se uria ishte ndoshta shkaku kryesor i vdekjes.

Vendimi erdhi në përgjigje të një peticioni të paraqitur vitin e kaluar nga Shoqata për të Drejtat Civile në Izrael (ACRI) dhe grupi izraelit i të drejtave Gisha. Grupet pretenduan se një ndryshim në politikën ushqimore të miratuar pas fillimit të luftës në Gaza, ka bërë që të burgosurit të vuajnë nga kequshqyerja dhe uria.

Vitin e kaluar, ministri i sigurisë kombëtare, Itamar Ben-Gvir, i cili mbikëqyr sistemin e burgjeve, u mburr se i kishte ulur kushtet e të burgosurve të sigurisë, në atë që ai e përshkroi si minimumin e kërkuar nga ligji izraelit.

Në vendimin e së dielës, paneli prej tre gjyqtarësh vendosi unanimisht se shteti është i detyruar ligjërisht t'u sigurojë të burgosurve ushqim të mjaftueshëm, për të siguruar "një nivel bazë ekzistence".

Në vendimin 2-1, gjyqtarët thanë se gjetën "indikacione se furnizimi aktual me ushqim për të burgosurit, nuk garanton mjaftueshëm pajtueshmërinë me standardin ligjor". Ata thanë se kishin gjetur "dyshime reale" se të burgosurit po hanin siç duhet dhe urdhëruan shërbimin e burgut të "ndërmerrte hapa për të siguruar furnizimin me ushqim, që lejon kushtet themelore të jetesës në përputhje me ligjin".

Ben-Gvir, i cili drejton një parti të vogël ultranacionaliste të ekstremit të djathtë, e kritikoi ashpër vendimin, duke thënë se ndërsa pengjet izraelite në Gaza nuk kanë askënd për t'i ndihmuar, gjykata supreme e Izraelit "për turpin tonë" po mbron militantët e Hamasit. Ai tha se politika e ofrimit të të burgosurve "kushteve më minimale të përcaktuara nga ligji", do të vazhdojë e pandryshuar.

ACRI bëri thirrje që vendimi të zbatohet menjëherë. Në një postim në X, ajo tha se shërbimi i burgjeve i ka “shndërruar burgjet izraelite në kampe torture”.

«Një shtet nuk i lë njerëzit të uritur», thuhej në të. «Njerëzit nuk i lënë njerëzit të uritur - pavarësisht se çfarë kanë bërë ata»./ The Guardian.