'Tersi' ndjek von der Leyen: E majta radikale dhe e djathta ekstreme përgatiten për mocione mosbesimi ndaj Komisionit Evropian

Presidentja e Komisionit Evropian, Ursula von der Leyen, e cila mbijetoi një votë mosbesimi para pushimeve të verës, po përballet me një sfidë të re në Parlamentin Evropian.

Grupi i Majtë dhe forcat e ekstremit të djathtë, të njohura si Patriotët për Evropën (PfE), janë duke përgatitur dy mocione të ndryshme mosbesimi kundër Komisionit Evropian, të cilat mund të shkojnë për votim në muajin tetor.

Mocionet e mosbesimit kërkojnë të paktën 72 nënshkrime nga eurodeputetët për t’u proceduar në seancën plenare. Pasi nënshkrimet të verifikohen dhe validohen nga shërbimet e Parlamentit, presidenti i tij duhet të informojë menjëherë ligjvënësit dhe të caktojë një debat plenar të paktën 24 orë më vonë.

E majta radikale kundër politikave të von der Leyen

Zëdhënësi i grupit të Majtë, Thomas Shannon, deklaroi të premten se mocioni i tyre është “në proces të mirë” dhe do të mbështetet unanimisht. Ai argumentoi se Komisioni Evropian po vepron në kundërshtim me interesat e punëtorëve dhe po dëmton Marrëveshjen e Gjelbër, duke mos marrë masa adekuate për krizën në Gaza dhe duke nënshkruar marrëveshje të diskutueshme si ajo me Mercosur-in.

Grupi i Majtë, që përfshin parti si Franca e Papërkulur, Podemos nga Spanja dhe Lëvizja Pesë Yje nga Italia, ka aktualisht 46 eurodeputetë, dhe për të arritur pragun i duhen edhe 26 nënshkrime të tjera. Zyrtarët e grupeve të tjera, si Socialistët, Demokratët e Renew Europe ose të Gjelbrit, nuk kanë konfirmuar mbështetje të plotë, por disa eurodeputetë të të Gjelbërve janë tashmë pjesë e mocionit.

Ekstremi i djathtë gjithashtu gati për sfidë

Ndërkohë, Patriotët për Evropën, që përfshijnë Tubimin Kombëtar të Francës, Fidesz të Hungarisë dhe Ligën e Italisë, po përgatisin një mocion të tyre të mosbesimit. Sipas burimeve të brendshme, ata mund ta paraqesin iniciativën shumë shpejt dhe nuk kanë nevojë për mbështetje nga grupe të tjera. Me 85 anëtarë të grupit, ata arrijnë pragun minimal, ndërsa rregullorja e Parlamentit kërkon që çdo mocion i ri, pas një votimi në dy muajt e fundit, të ketë mbështetje nga të paktën një e pesta e eurodeputetëve.

Kjo situatë krijon një konkurrencë mes e Majtës dhe PfE-së për të parë se cili mocion do të paraqitet i pari dhe mund të shkojë në votim që në tetor. Debati dhe votimi duhet të zhvillohen në të njëjtën seancë plenare pas paraqitjes së mocionit.

Një rrugë e vështirë drejt rrëzimit të Komisionit

Megjithëse paraqitja e mocioneve është relativisht e lehtë, rrëzimi i Komisionit Evropian kërkon një shumicë prej dy të tretash të votave të hedhura. Në votën e fundit, vetëm 175 eurodeputetë votuan pro, shumë larg shumicës së nevojshme. Për të majtën dhe ekstremin e djathtë, të cilët kanë arsye të ndryshme për të mos e pëlqyer Komisionin e von der Leyen, rruga drejt largimit nga pushteti mbetet komplekse dhe e ndërlikuar.