Vendet ku jeta është më e lirë për emigrantët

Me rritjen e kostos së jetesës dhe pasigurinë ekonomike globale, shumë persona po zbulojnë se shpërngulja jashtë vendit mund të ofrojë një mënyrë për të arritur një cilësi më të mirë jetese me më pak shpenzime. Vietnami është shpallur sërish vendi më i arritshëm në botë për emigrantët për të pestin vit radhazi.

Sipas studimit të vitit 2025 të Expat Insider, të kryer nga InterNations, një platformë online dhe komunitet global për emigrantët, Vietnami është destinacioni më i favorshëm për të huajt dhe renditet i pari nga 46 destinacione në indeksin e financave personale, raporton Nova.rs. Studimi, i cili kryhet që nga viti 2014, mbledh të dhëna nga mbi 10,000 emigrantë që përfaqësojnë 172 kombësi që jetojnë në të gjithë botën, sipas raportimit të CNBC.

10 vendet më të favorshme për emigrantët

Vendet aziatike dominojnë listën e financave personale të favorshme për emigrantët, me pesë nga 10 vendet kryesore nga Azia Juglindore: Vietnami, Tajlanda, Indonezia, Filipinet dhe Malajzia. “Krahasuar me vitin 2024, nëntë nga 10 vendet e para ruajnë këtë titull. Vetëm Malajzia (në vendin e nëntë) është e re, pasi ka avancuar nga vendi i 11-të vitin e kaluar,” thuhet në raport.

Vlen të përmendet se asnjë vend evropian nuk figuron në listën e vendet më të favorshme.

Destinacionet më të përballueshme në vitin 2025, sipas të dhënave të InterNations, janë:
1. Vietnami
2. Kolumbia
3. Panamaja
4. Kina
5. Tajlanda
6. Indonezia
7. Filipinet
8. Meksika
9. Malajzia
10. Brazili

Në Vietnam, 89% e emigrantëve të kënaqur me kushtet financiare

Pjesëmarrësve në anketë iu kërkua të vlerësonin kënaqësinë e tyre me gjendjen financiare, kostot e përgjithshme të jetesës dhe nëse të ardhurat e disponueshme familjare janë të mjaftueshme për të jetuar rehat në vendin e tyre të banimit. Duke analizuar përgjigjet, u krijua indeksi i financave personale.

Në Vietnam, 89% e të anketuarve ishin të kënaqur me koston e përgjithshme të jetesës, ndërsa 87% thanë se të ardhurat e tyre të disponueshme familjare janë të mjaftueshme ose më shumë se të mjaftueshme për të jetuar rehat, krahasuar me 40% dhe 69% në nivel global. Kjo stabilitet financiar shpjegon pse 54% e emigrantëve kanë jetuar atje për pesë vjet ose më shumë dhe 30% planifikojnë të qëndrojnë përgjithmonë.

Në Kolumbi, 92% e të anketuarve vlerësuan se të ardhurat e tyre të disponueshme janë të mjaftueshme për një jetë të rehatshme, krahasuar me 69% globalisht. Për më tepër, asnjë emigrant nuk përmendi koston e jetesës si shqetësimin kryesor para se të zhvendosej, në kontrast me mesataren globale prej 21%.
Ndërkohë, Panamaja është shumë popullore midis pensionistëve – 35% e atyre që u zhvendosën atje ishin tashmë në pension, krahasuar me vetëm 11% në nivel global.

Vendet më pak të arritshme për emigrantët

Studimi i InterNations identifikoi gjithashtu vendet më pak të arritshme në vitin 2025, ku 10 vendet kryesore janë:
1. Kanada
2. Mbretëria e Bashkuar
3. Finlanda
4. Turqia
5. Katari
6. Singapori
7. Koreja e Jugut
8. Irlanda
9. Australia
10. Norvegjia

Kjo tregon një diferencë të konsiderueshme midis vendeve të Azisë Juglindore dhe shumë vendeve perëndimore, ku emigrantët shpesh përballen me kosto më të larta jetese dhe sfida financiare.