Më herët gjatë këtij viti, fletushka ranë nga një helikopter mbi Culiacán, kryeqyteti i shtetit meksikan të Sinaloas, duke akuzuar një sërë influencerësh dhe muzikantësh për shërbim ndaj krimit të organizuar.

Katër nga 25 fytyrat në fletushkë tashmë kishin vulosur mbi to fjalën “ELIMINUAR”. Që atëherë, edhe dy të tjerë janë vrarë.

Më i fundit ishte Camilo Ochoa, një ish-narko i kthyer në YouTuber, i cili u qëllua për vdekje më 17 gusht.

Në mes të një lufte mes fraksioneve të kartelit të Sinaloas, influencerët janë bërë shënjestër, duke pasqyruar si rolin e tyre të dyshuar në pastrimin e parave, ashtu edhe vendin e tyre në propagandën e kartelit, si dhe luftën paralele që zhvillohet online.

Konflikti në Sinaloa shpërtheu pasi Ismael “El Mayo” Zambada, i cili themeloi kartelin e Sinaloas me Joaquín “El Chapo” Guzmán, u ndalua nga autoritetet amerikane së bashku me një nga djemtë e Guzmán-it, pasi një avion i vogël u ul në Teksas në korrik 2024.

El Mayo akuzoi djalin e El Chapo-s për tradhti dhe se e dorëzoi atë tek autoritetet amerikane. Tani një fraksion i udhëhequr nga djali i El Mayo-s po lufton kundër një tjetri të udhëhequr nga dy djemtë e El Chapo-s që janë ende të lirë në Meksikë.

Konflikti ka lënë pothuajse 2 mijë të vdekur deri tani, përfshirë gjashtë influencerët në fletushka dhe disa të tjerë që nuk ishin në të.

Fletushkat duket se janë shpërndarë nga fraksioni i El Mayo-s, pasi akuzonte influencerët për pastrim parash për djemtë e El Chapo-s.

Pas një vale të mëparshme sulmesh ndaj influencerëve në Sinaloa, përfshirë një YouTuber të njohur si El Jasper, i cili u gjet me 70 plagë plumbash, të tjerët në listë kërkuan strehë në shtete të tjera.

Por tani ata po ndiqen edhe përtej kufijve të Sinaloas. Ochoa u vra në shtetin e Morelos. Dhe para kësaj, Gail Castro, vëllai i influencerit të famshëm Markitos Toys, u qëllua për vdekje në shtetin e Baja California.

Markitos Toys, 26 vjeç, ishte në krye të listës së fletushkave, të cilat u shpërndanë në janar. Ai nisi të kishte shumë ndjekës rreth gjashtë vite më parë dhe ka ngjallur polemika për miqësinë e tij me persona pranë djemve të El Chapo-s, si dhe për stilin e tij të jetesës luksoze me makina sportive e marka të shtrenjta.

Markitos Toys u përfshi në një listë prej 64 influencerësh në Sinaloa, që sipas raportimeve të Milenio-s, janë nën hetim nga Njësia e Inteligjencës Financiare të Meksikës, nën dyshimin se ndjekësit e tyre janë rritur artificialisht nga grupet e krimit të organizuar. Një pjesë e parave “të pastra” që këta influencerë marrin nga platformat për përmbajtjen e tyre mund t’i kthehet më pas karteleve.

Markitos Toys i ka mohuar akuzat. Por ai ka qenë kudo përveç Sinaloas që kur shpërtheu lufta dhe shtëpia e prindërve të tij në Culiacán u qëllua me armë. Në trotuarin jashtë, dikush kishte gdhendur “MF”, shenja e Mayito Flaco-s, djalit të El Mayo-s.

“Krimi i organizuar gjithmonë kërkon mënyra të reja për të pastruar para: çdo centimetër i ekosistemit shqyrtohet nga analistët financiarë”, tha Salvador Mejía, një avokat i specializuar në financa të paligjshme.

Por Mejía shtoi se influencerët mbeten një kanal relativisht i vogël për pastrimin e parave dhe se dobia e tyre e vërtetë për grupet e krimit të organizuar qëndron në fushën e propagandës.

“Kartelët kanë departamentet e tyre të PR-it. Ajo që kemi është një makinë propagande”, tha Mejía.

Grupet e krimit të organizuar prej kohësh kanë përdorur video makabre të torturës, rrëfimeve dhe ekzekutimeve, ose mesazhe të shkruara në pankarta, shpesh të lëna pranë trupave, për të dërguar mesazhe dhe për të manipuluar opinionin publik.

Së fundmi ata janë zhvendosur në rrjetet sociale, ku narco-influencerët reklamojnë një stil jetese dhe afërsi me krimin e organizuar, shpesh të paraqitur në terma aspirues dhe në përmbajtje të dizajnuar për të tërhequr adoleshentët.

Tani këta influencerë janë tërhequr në një luftë paralele propagande në Sinaloa, ku mund t’u kërkohet të përcjellin mesazhe të caktuara dhe ku ata vetë janë bërë objektiva, tha Javier Llausas, drejtor i organizatës “Ndërtimi i Hapësirave për Paqe”, një OJQ në Sinaloa.

“Kjo është luftë. Dhe si në çdo luftë, propaganda ka rëndësi”, tha Llausas./ The Guardian