Kryeministri izraelit Benjamin Netanyahu sulmoi homologun e tij belg të mërkurën, duke e quajtur atë "një udhëheqës të dobët që kërkon të qetësojë terrorizmin islamik, duke sakrifikuar Izraelin”, një ditë pasi Brukseli njoftoi se do të njihte një shtet palestinez.

Qeveria e Netanyahut është zemëruar nga premtimet e Francës, Britanisë, Kanadasë, Australisë dhe tani Belgjikës, për të njohur zyrtarisht një shtet palestinez kur udhëheqësit botërorë të mblidhen këtë muaj në selinë e Kombeve të Bashkuara në Nju Jork.

Kryeministri i Belgjikës, Bart De Wever, "dëshiron ta ushqejë krokodilin terrorist përpara se ai të përpijë Belgjikën", shkroi zyra e kryeministrit izraelit në llogarinë e saj zyrtare X.

Izraeli do të vazhdojë të mbrojë veten, tha ajo.

Netanyahu në mënyrë të ngjashme sulmoi kryeministrin australian Anthony Albanese muajin e kaluar, duke e etiketuar atë si "të dobët", pasi Canberra njoftoi se do të njihte një shtet palestinez dhe më pas ndaloi një ligjvënës izraelit të krahut të djathtë të hynte në vend.

Palestinezët kanë kërkuar prej kohësh një shtet në Bregun Perëndimor të pushtuar nga Izraeli, në Jerusalemin Lindor dhe në Gaza. Zyrtarët izraelitë kanë hedhur poshtë premtimet për të njohur një shtet palestinez, duke thënë se kjo nuk e ndryshon realitetin në terren.

Netanyahu ka thënë se njohja e një shteti palestinez do të shërbente si shpërblim për sulmin e Hamasit më 7 tetor 2023 ndaj Izraelit, i cili shkaktoi luftën në Gaza. Izraeli është përballur me presion ndërkombëtar në rritje, për shkak të humbjeve që ofensiva e tij ushtarake i ka shkaktuar popullsisë civile në Rripin e shkatërruar të Gazës./ Reuters.