Trump: Do të përpiqem t’i rikthej Ukrainës disa territore gjatë takimit me Putinin në Alaska

Presidenti i SHBA-së, Donald Trump, ka deklaruar se gjatë takimit të tij me presidentin rus, Vladimir Putin, të premten në Alaska, do të përpiqet të rikthejë Ukrainës një pjesë të territoreve të pushtuara nga Rusia.

“Rusia ka pushtuar një pjesë të madhe të Ukrainës. Ata kanë pushtuar territorin më të rëndësishëm. Ne do të përpiqemi t’ia kthejmë Ukrainës një pjesë të atij territori”, tha Trump në një konferencë për shtyp, duke paralajmëruar për “disa shkëmbime territoriale” mes dy vendeve, pa dhënë detaje se çfarë mund të përfshijë marrëveshja.

Trump e përshkroi takimin si “entuziaste” dhe theksoi se mund të kuptojë brenda dy minutash nëse do të ketë përparim me Putinin. Ai shtoi se çdo propozim i Kremlinit do të diskutohet fillimisht me presidentin e Ukrainës, Volodymyr Zelensky, “nga respekti”, para se të njoftohen liderët evropianë.

Megjithatë, Zelensky paralajmëroi se çdo marrëveshje që nuk përfshin Kievin do të ishte “e vdekur” që në fillim, ndërsa shërbimet e inteligjencës ukrainase raportojnë se nuk ka shenja se Rusia po planifikon t’i japë fund luftimeve.

Takimi i së premtes vjen në ditën e afatit të vetëimponuar nga Trump që Rusia të pranojë armëpushimin ose të përballet me më shumë sanksione amerikane. Liderët e BE-së kanë theksuar se çdo marrëveshje SHBA–Rusi duhet të përfshijë edhe Ukrainën dhe Evropën në mënyrë që të ruhet uniteti transatlantik.