Tensionet mes Parisit dhe Madridit janë rritur ndjeshëm pas një incidenti të ndodhur më 23 korrik, kur rreth 40 adoleshentë hebrenj francezë u nxorën nga një fluturim i linjës ajrore Vueling në aeroportin e Valencias. Ngjarja ka ngjallur debate të forta dhe akuza për antisemitizëm, të cilat janë hedhur poshtë si nga kompania ajrore ashtu edhe nga autoritetet spanjolle.

Ministri spanjoll i Transportit, Oscar Puente, ndezi më tej polemikat kur në një postim të fshirë më pas në platformën X, kritikoi politikanët konservatorë për “mbështetjen e fëmijëve izraelitë” dhe jo të kompanisë ajrore, duke i quajtur të pajustifikuara sulmet ndaj Vueling. Këto komente provokuan një reagim të ashpër nga qeveria franceze, e cila i denoncoi si krahasime të papranueshme mes fëmijëve hebrenj francezë dhe shtetasve izraelitë.

Ministrat francezë Benjamin Haddad dhe Aurore Bergé dënuan ashpër sjelljen e autoriteteve spanjolle dhe veçanërisht mënyrën e trajtimit të një prej shoqëruesve të rritur të grupit, i cili shihet në videot e shpërndara në rrjetet sociale teksa mbahej përtokë dhe prangohej nga policia.

Nga ana e saj, linja ajrore Vueling ka sqaruar se vendimi për largimin e të rinjve u mor për shkak të sjelljeve që cënonin sigurinë e fluturimit, përfshirë manipulimin e maskave të oksigjenit dhe jelekëve të shpëtimit, pavarësisht paralajmërimeve të ekuipazhit. Por organizatorët e kampit veror e kanë hedhur poshtë këtë version, duke e cilësuar përjashtimin si të padrejtë dhe të pabazuar.

Prindërit dhe përfaqësuesit e grupit kanë paralajmëruar ngritjen e një ankese zyrtare kundër kompanisë për “dhunë fizike e psikologjike dhe diskriminim në bazë të fesë”, ndërsa përplasja diplomatike pritet të intensifikohet në ditët në vijim.