Tetëmbëdhjetë vende kërkuan 127 miliardë euro në kredi të lira nga Komisioni Europian deri në afatin e së martës për të forcuar mbrojtjen e tyre dhe potencialisht për të blerë armë për Ukrainën.

Në një fitore të madhe për Komisionin, vendet që shtrihen nga Estonia në Portugali kërkuan të merrnin pjesë në skemën e saj të kredive për armë të Instrumentit të Ndihmës së Sigurisë për Evropën  (SAFE), e cila ofroi deri në 150 miliardë euro kredi me interes të ulët.

Iniciativa është pjesë e programit më të gjerë të Komisionit, ReArm Europe,  të propozuar  në mars, i cili synon të zvogëlojë varësinë ushtarake të bllokut nga Shtetet e Bashkuara, e cila është zgjatur prej dekadash.

Komisioni shkroi në një deklaratë të mërkurën se vendet e mëposhtme shprehën interes për të marrë kreditë: Belgjika, Bullgaria, Qiproja, Republika Çeke, Estonia, Spanja, Finlanda, Hungaria dhe Lituania, Sllovakia, Letonia, Kroacia, Polonia, Greqia, Portugalia, Rumania, Franca dhe Italia.

Në kërkesën e tyre drejtuar Komisionit, vendet përcaktojnë një shumë minimale dhe maksimale që do të kërkojnë zyrtarisht të marrin hua më vonë gjatë vitit. Kjo i hap rrugën ekzekutivit të BE-së për të përdorur tregjet financiare dhe për të marrë hua në emër të 27 vendeve anëtare të saj.

Komisioni nuk raportoi shifrat për secilin vend, por zëvendëskryeministri i Polonisë Władysław Kosiniak-Kamysz  shkroi në X se Varshava kërkoi 45 miliardë euro — ndoshta kërkesa më e lartë nga çdo vend individual.

“Interesi i fortë për SAFE, me të paktën 127 miliardë euro në prokurime të mundshme në mbrojtje, tregon unitetin dhe ambicien e BE-së në siguri dhe mbrojtje”, shkroi në një deklaratë komisioneri i mbrojtjes i BE-së, Andrius Kubilius.

Duke blerë së bashku armë përmes SAFE, vendet mund të sigurojnë një çmim më të ulët sesa do të siguronin duke vepruar vetëm, dhe mund të shlyejnë kreditë e lira gjatë një afati kohor prej 45 vitesh. Aleatët kryesorë të Ukrainës thanë se do ta përdorin skemën për ta furnizuar me armatime në vendin e shkatërruar nga lufta.

Komisioni tha se e marta ishte vetëm një "afat i shkurtër" dhe se ata që vonohen nuk do të refuzohen. Vendet duhet të paraqesin zyrtarisht kërkesën për kredi dhe projektet e mbrojtjes që synojnë të kryejnë në kuadër të SAFE para afatit të 30 nëntorit./ Politico.