Kryeministri i Pakistanit: Marrëveshja e paqes SHBA-Iran do të nënshkruhet në Zvicër më 19 qershor

Kryeministri pakistanez Shehbaz Sharif njoftoi këtë mëngjes se SHBA-të dhe Irani kanë arritur një marrëveshje paqeje dhe se ceremonia zyrtare e nënshkrimit do të mbahet të premten, më 19 qershor, në Zvicër, një veprim i mirëpritur nga zyrtarët botërorë.

Sharif deklaroi në rrjetin social X se të dyja palët kanë shpallur një ndërprerje të menjëhershme dhe të përhershme të operacioneve ushtarake në të gjitha frontet, përfshirë Libanin.

Ai falënderoi Uashingtonin dhe Teheranin për angazhimin e tyre për të gjetur një zgjidhje diplomatike për konfliktin, si dhe udhëheqjen e Katarit, Arabisë Saudite dhe Turqisë për kontributin e tyre të jashtëzakonshëm.

Presidenti i SHBA-së, Donald Trump, shkroi në rrjetin e tij social Truth Social se “marrëveshja me Republikën Islamike të Iranit tani është përfunduar” dhe se Ngushtica e Hormuzit do të hapet “pa taksa” dhe se bllokada detare amerikane do të hiqet.

“Anije të botës, ndizni motorët tuaj. Lëreni naftën të rrjedhë!”, shkroi Trump.

Burime të shumta i thanë më parë Reuters se draft-marrëveshja parashikon rihapjen e Ngushticës së Hormuzit, heqjen e bllokadës amerikane ndaj porteve iraniane dhe zgjatjen e armëpushimit, si dhe se negociatat mbi programin bërthamor të Iranit do të vazhdojnë për 60 ditët e ardhshme.Mediat raportuan se teksti i marrëveshjes do të publikohet pas nënshkrimit të saj më 19 qershor.

Marrëveshja u mirëprit nga Sekretari i Përgjithshëm i Kombeve të Bashkuara, Antonio Guterres, i cili tha se ajo përfaqësonte një hap kyç drejt një zgjidhjeje paqësore të konfliktit.

Presidenti i Këshillit Evropian, Antonio Costa, tha se Bashkimi Evropian është gati të kontribuojë në strategjinë për vendosjen e "paqes së qëndrueshme", dhe Përfaqësuesja e Lartë e BE-së për Punët e Jashtme dhe Politikën e Sigurisë, Kaia Kallas, vlerësoi se marrëveshja e arritur mund të ofrojë hapësirën e nevojshme për negociata më të thella mbi programin bërthamor iranian dhe çështje të tjera kyçe.

Gjermania, Italia, Franca dhe Mbretëria e Bashkuar kanë thënë se janë të gatshme të heqin sanksionet ndaj Iranit nëse Teherani ndërmerr hapa të qartë dhe të verifikueshëm në lidhje me programin e tij bërthamor, duke shtuar se Irani nuk duhet të pajiset kurrë me armë bërthamore.

Kryeministri i Katarit, Mohammed bin Abdulrahman al-Thani, deklaroi në rrjetet sociale se të gjitha palët në negociatat e ardhshme duhet t'i qasen atyre me një frymë pozitive dhe konstruktive, ndërsa presidenti turk, Recep Tayyip Erdogan, u bëri thirrje të gjitha palëve të përmbahen nga retorika, provokimet dhe veprimet që mund të rrisin tensionet, si dhe të jenë vigjilentë ndaj sabotimeve të mundshme, deri në nënshkrimin e marrëveshjes.

Pas lajmit për marrëveshjen dhe datën e nënshkrimit, çmimi i naftës së papërpunuar Brent ra me 3.45 dollarë për fuçi dhe tani është 83.88 dollarë për fuçi, ndërsa çmimet e aksioneve në Azi u rritën.