BBC

Presidenca siriane ka shpallur një "armëpushim të menjëhershëm" në qytetin jugor të Suweida-s, në përpjekje për t’i dhënë fund një jave dhune sektare që ka lënë qindra të vdekur.

Ka pasur shkëmbime kaotike zjarri në rrugët e qytetit midis fisnorëve lokalë beduinë dhe komunitetit druz, me të dyja palët të akuzuara për mizori. Pamje tronditëse tregojnë trupa të shtrirë rrugëve.

“Kjo kohë kërkon unitet të radhëve dhe bashkëpunim të plotë për të kapërcyer atë që po përjetojmë të gjithë,” tha presidenti i përkohshëm i Sirisë, Ahmed al-Sharaa.

Armëpushimi erdhi pasi forcat e sigurisë së brendshme siriane u dislokuan në Suweida për t’i dhënë fund përleshjeve — një lëvizje e miratuar nga Izraeli, për sa kohë që qytetarët druzë mbeteshin të mbrojtur.

Izraeli ndërhyri në konflikt më herët gjatë kësaj jave, duke goditur forcat qeveritare dhe ndërtesën e ministrisë së mbrojtjes në Damask, ndërsa shpalli mbështetjen e tij për komunitetin druz.

Komuniteti druz i Suweida-s ndjek një besim unik dhe sekret, i cili rrjedh nga Islami Shiit, dhe shfaq mosbesim ndaj qeverisë aktuale në Damask. Ata janë një pakicë në Siri, si edhe në Izraelin dhe Libanin fqinj.

Sipas Observatorit Sirian për të Drejtat e Njeriut (SOHR), me bazë në Britani, 718 persona janë vrarë që nga shpërthimi i dhunës të dielën.

Përplasjet fillimisht nisën mes luftëtarëve beduinë dhe fraksioneve druze, përpara se të përfshiheshin edhe forcat e sigurisë së qeverisë që u dërguan në zonë.

Ambasadori amerikan në Turqi, Tom Barrack, njoftoi për herë të parë të premten se Siria dhe Izraeli kishin rënë dakord për një armëpushim. Ai tha se armëpushimi mbështetej nga fqinjët, përfshirë Turqinë dhe Jordaninë, megjithatë Izraeli ende nuk ka komentuar për marrëveshjen.

"U bëjmë thirrje druzëve, beduinëve dhe sunnitëve të lënë armët dhe, së bashku me pakicat e tjera, të ndërtojnë një identitet të ri dhe të bashkuar sirian në paqe dhe mirëqenie me fqinjët e tij," tha Barrack, i cili është gjithashtu Emisari i Posaçëm i Uashingtonit për Sirinë.

Korrespondentja e BBC-së për Lindjen e Mesme, Lina Sinjab, duke raportuar nga Siria, tha se dhuna ndaj druzëve po përhapet në të gjithë vendin.

Më herët këtë javë, kreu i të drejtave të njeriut në OKB, Volker Türk, tha se zyra e tij kishte marrë raporte të besueshme që tregonin për shkelje dhe abuzime të përhapura gjatë përleshjeve, përfshirë ekzekutime pa gjyq dhe vrasje arbitrare në Suweida.

Sipas Türk, ndër autorët e dyshuar ishin pjesëtarë të forcave të sigurisë dhe individë të lidhur me qeverinë e përkohshme, si dhe elementë të armatosur lokalë druza dhe beduinë.

“Kjo derdhje gjaku dhe dhunë duhet të ndalet,” paralajmëroi ai, duke shtuar se “ata që janë përgjegjës duhet të mbahen përgjegjës”.

Në komentet e tij të mëngjesit të së shtunës, udhëheqësi sirian tha se qeveria e tij “është e përkushtuar të mbrojë të gjitha pakicat dhe sektet në vend dhe po vepron për të vënë përpara drejtësisë të gjithë shkelësit, nga cilado palë. Askush nuk do t’i shpëtojë përgjegjësisë.”