Ish-presidenti Donald Trump i tha bashkëprezantuesit të "Fox & Friends", Lawrence Jones se është i bindur se mund ta fitojë Nju Jorkun në nëntor, pasi mblodhi 25,000 mbështetës në Bronksin blu - një zonë që nuk i ka votuar republikanët prej një shekulli.

"Kur i shihni të gjithë këta njerëz këtu me prejardhje të ndryshme, a mendoni se Partia Republikane mund të fitojë këtu?" e pyeti Jones Trump-in të enjten. "A mund ta merrni këshillin e qytetit, bashkinë, postin e guvernatorit?"

"Nuk di për garat e tjera. Mendoj se ne mund të fitojmë Nju Jorkun si kandidat presidencial, sepse kam një marrëdhënie të veçantë me këta njerëz," u përgjigj ish-presidenti.

Aktiviteti i Trump-it erdhi pas një vizite në Nju Xhersin fqinj, ku ai tërhoqi një turmë prej 80,000 deri në 100,000 njerëzish në shtetin tradicional blu.

"Kemi turmat më të mëdha që kemi pasur ndonjëherë," tha Trump, duke shpjeguar se ai e ka rritur totalin e votave të tij nga 2016 me rreth 11 milionë në 2020-ën.

"Do ta them këtë. Edhe pse 2016 dhe 2020 ishin të mirë, nuk janë asgjë krahasuar me atë që po ndodh tani, dhe ju e shihni këtë", vazhdoi ai.

Trump mblodhi një turmë me rreth 25,000 mbështetës në Crotona Park në Bronks të enjten, shumë më tepër se 3500 që priteshin të merrnin pjesë. Këta numra dukej se përfshinin edhe ata që ishin rreshtuar jashtë aktivitetit – të cilët prisnin orë të tëra për të hyrë brenda.

Mijëra njerëzit që u mblodhën për të parë ish-presidentin ishin një grup i larmishëm njerëzish, duke përfshirë atë që Fox News Digital vuri në dukje se ishin mbështetës të zinj, hispanikë, të bardhë, aziatikë dhe myslimanë. Një numër i të pranishmëve udhëtuan nga Pensilvania, Nju Xhersi dhe Konektikati. Shumë thanë se ishin nga Bronksi, Bruklini ose Kuinsi.

Një sondazh i Sienës këtë muaj zbuloi se Trump ishte pas Biden-it me nëntë pikë në Nju Jork, një shtet që Biden e mbajti me 23 pikë në 2020-ën. Një pjesëmarrës në tubim i tha Alexis McAdams-it të Fox News se Trump mund ta fitojë "absolutisht" Empire State.

"Shumë herë njerëzit i marrin gjërat si të mirëqena. Njerëzit mendonin se Hillary do të merrte presidencën... dhe kjo nuk ndodhi, kështu që gjithmonë ka vend për surpriza."

Trump u zotua se "do ta ndryshojë qytetin e Nju Jorkut", duke premtuar se do të sjellë siguri dhe shkolla më të mira në qytet. Ai u zotua, nëse zgjidhet, se do të punojë me guvernatoren demokrate Kathy Hochul dhe kryetarin demokrat Eric Adams për të rregulluar qytetin dhe shtetin, duke përfshirë rinovimin e sistemit të metrosë, pastrimin e parqeve dhe largimin e të pastrehëve dhe të sëmurëve mendorë nga rrugët.

"Është koha për një ndryshim të udhëheqjes," i tha një tjetër pjesëmarrës McAdams-it. "Kemi vite që votojmë të njëjtën parti dhe asgjë nuk ka ndryshuar. Gjërat kanë dalë jashtë kontrollit. Kemi probleme strehimi. Kemi probleme me të pastrehët, me të sëmurët mendorë, me krimin. Po ndodhin shumë gjëra këtu. Inflacioni".

Trump gjithashtu e përdori fjalimin për të kundërshtuar çështjet ekonomike me të cilat përballet vendi nën administratën e Biden-it, duke i vënë theksin familjeve të zeza dhe hispanike. Ai përsëriti disa nga rreshtat e tij të përdorur shpesh për energjinë, inflacionin dhe me të qenit "i dobët" në skenën e huaj.

"Jam rritur me një mendësi të caktuar," tha një mbështetëse, duke shpjeguar se ajo dëshiron të "ndreqë një gabim" duke zgjedhur Trump-in.