Moskë/Dushanbe - Rusia ka lënë në paraburgim të martën një burrë të lindur në Kirgistan, i dyshuar për përfshirje në të shtënat masive të së premtes në një sallë koncertesh në Moskë dhe dërgoi disa hetues në Taxhikistan për të marrë në pyetje familjet e katër burrave të akuzuar për kryerjen e sulmi.

Tetë të dyshuar tani janë vënë në paraburgim që kur persona të armatosur derdhën breshëri plumbash mbi pjesëmarrësit e koncertit në sulmin më vdekjeprurës në Rusi në dy dekada, disa ditë pasi Presidenti Vladimir Putin festoi zgjedhjet që i dhanë atij mandatin e pestë.

Shteti Islamik ka marrë përgjegjësinë dhe ka publikuar pamjet nga sulmi. Shtetet e Bashkuara dhe Franca thanë se shërbimet sekrete gjykonin se ky grup qendronte me të vërtetë pas sulmit, në të cilin 139 njerëz u vranë dhe 182 u plagosën.

Putin tha të hënën se sulmi ishte kryer nga militantët islamikë, por gjithashtu pretendoi  se edhe Ukraina, e cila është në luftë me Rusinë, mund të ketë luajtur një rol. Por Ukraina e ka mohuar çdo përfshirje.

Militantët vetë nuk kanë identifikuar asnjë nga sulmuesit.

Rusia ka thënë se katër personat e dyshuar të armatosur kanë rrëfyer, por disa u shfaqën me shenja lëndimesh kur u paraqitën në gjykatë, duke ngritur shqetësimin se ata ishin torturuar.

Komisioneri rus për të Drejtat e Njeriut tha se ndalimi i të dyshuarve duhet të kryhet në përputhje me ligjin, njoftoi agjencia e lajmeve TASS, pasi u publikuan video që tregonin marrjen në pyetje të të dyshuarve. Njërit madje i është prerë një pjesë e veshit gjatë marrjes në pyetje.