Ndërsa Këshilli i Sigurimit i OKB-së kërkon një armëpushim të menjëhershëm në Gaza dhe shqetësimet rriten se zia e bukës mund të ndodhë, civilët e uritur të territorit po kërkojnë një bimë të gjelbër të egër të quajtur Khobiza nga mungesa e ndonjë gjëje tjetër për të ngrënë. Është një tjetër kujtesë e vuajtjeve në enklavën palestineze gjatë pesë muajve të luftës që pasuan sulmin e 7 tetorit në Izrael, kur militantët e Hamasit vranë 1200 njerëz dhe morën 253 pengje, sipas të dhënave izraelite.

Sulmi shkaktoi një përgjigje të ashpër nga Izraeli, i cili filloi sulmet ajrore dhe granatimet në Gaza që kanë vrarë mbi 32,000 palestinezë, sipas autoriteteve shëndetësore të enklavës, duke shënuar konfliktin më të keq midis Izraelit dhe Hamasit. “Gjithë jetën tonë, edhe gjatë luftërave të mëparshme, ne nuk kemi ngrënë Khobiza,” tha gruaja palestineze Maryam Al-Attar. “Vajzat më thonë “duam të hamë bukë o nënë”. Më thyhet zemra për to”, shton ajo cituar nga Reuters.

“Unë nuk mund t’u gjej një copë bukë. Shkoj e mbledh Khobiza. Khobizën e kemi gjetur tani për tani, por në të ardhmen nga do ta marrim? Khobiza do të mbarojë. Ku të drejtohemi?”, shton ajo.

Palestinezët vuajnë në një kohë kur ata duhet të agjërojnë muajin e shenjtë të Ramazanit, si miliona muslimanë të tjerë në mbarë botën që shijojnë darka të mëdha me familjet e tyre të gjera dhe shikojnë shfaqje të veçanta televizive. “Ne jemi konsumuar nga uria. Nuk kemi çfarë të hamë. Ne dëshirojmë perime, peshk dhe mish. Agjërojmë me stomak bosh. Nuk mund të agjërojmë më. Na merren mendtë nga uria. Nuk ka asgjë për ta ndihmuar trupin të rezistojë”, tha Umm Mohamed.

Uria është e pashmangshme dhe ka të ngjarë të ndodhë deri në maj në Gazën veriore dhe mund të përhapet në të gjithë enklavën deri në korrik, tha më 18 mars mbikëqyrësi botëror i urisë, i njohur si Klasifikimi i Fazës së Sigurisë së Ushqimit të Integruar (IPC).

Frika se Kobiza do të ofrojë vetëm lehtësim të përkohshëm po rritet në një kohë kur pasiguria rreth dhënies së ndihmës po thellohet dhe ndërsa ndërmjetësit kërkojnë të ngushtojnë boshllëqet midis Izraelit dhe Hamasit mbi kushtet për një armëpushim dhe lirimin e pengjeve.

Të hënën, një zëdhënës i qeverisë izraelite tha se Izraeli do të ndalojë së punuari me Agjencinë e OKB-së për Ndihmë dhe Punë në Rripin e Gazës, deri tani organi më i madh i ndihmës në Gaza, duke akuzuar agjencinë e ndihmës për vazhdimin e konfliktit.