Këtu janë disa nga imazhet e fundit që janë dërguar nga Moska, nga skena e sulmit në Bashkinë e Crocus, ku dihet se janë vrarë të paktën 93 persona, përfshirë tre fëmijë.

Sergej Sobyanin, kryebashkiaku i Moskës, ka njoftuar se qeveria rajonale do të ofrojë ndihmë financiare për ata që janë prekur nga sulmi.

Agjencia e lajmeve Tass raporton se mbështetja financiare do të jetë e disponueshme si për banorët, ashtu edhe për ata jorezidentë në Moskë dhe do të jetë nga 500,000 deri në 3 milion rubla (ose nga 4300 deri në 25.700 paund apo 5400 deri në 32,500 dollarë).

Tass gjithashtu raporton se rajoni i Moskës ka thënë se do të organizojë funeralet për viktimat.

Ministria e Shëndetësisë në rajonin e Moskës ka publikuar identitetin e 41 nga të paktën 93, personat që dihet se janë vrarë në sulm. Në listën e papërfunduar, viktima më e re në moshë e identifikuar deri më tani është 33 vjeç dhe më e vjetra, 71-vjeç.

Shërbimi rus i BBC-së dha disa detaje më shumë për ata që janë në spital pas sulmit. Duke cituar Ministrinë e Shëndetësisë të Rusisë, raportohet se 16 persona, përfshirë një fëmijë janë në një gjendje "jashtëzakonisht të rëndë" dhe se 44 persona të tjerë, përfshirë dy fëmijë janë në një gjendje "të rëndë".

Në Rusi, agjencia Tass në kanalin e saj Telegram, ka publikuar imazhe që tregojnë se auditori ku do të mbahej një koncert i grupit Picnic mbrëmë dhe ku ndodhi pjesa më e madhe e të shtënave gjatë sulmit, është shkatërruar plotësisht nga zjarri. Duke cituar Ministrinë e Situatave të Emergjencave, ajo konfirmoi se çatia u shemb si pasojë e zjarrit.