Të paktën një e pesta e pengjeve të mbetur të Hamasit kanë vdekur, thotë Izraeli. Izraeli ka informacione që tregojnë se të paktën 31 nga 136 pengjet e mbajtura në Gaza kanë vdekur që nga fillimi i luftës. Familjet e pengjeve që supozohet të jenë vrarë tashmë janë njoftuar.

Kundëradmirali Daniel Hagari, zëdhënësi kryesor ushtarak i Izraelit, tha në një konferencë shtypi: "Ne kemi informuar 31 familje se të dashurit e tyre nuk janë më në mesin e të gjallëve dhe se i kemi shpallur të vdekur".

Ai nuk e zbuloi shkakun e vdekjes së tyre.

Brenda disa javësh nga sulmi i Hamasit në jug të vendit, Izraeli krijoi një task forcë të posaçme që bashkon ushtrinë, ekspertët mjeko-ligjorë dhe mjekët, të cilët analizuan provat e zbuluara nga trupat izraelite në Gaza për të verifikuar raportet për vrasjen e disa pengjeve.

Katër zyrtarë izraelitë të cituar nga New York Times thanë se Izraeli po shqyrtonte gjithashtu informacionet e pakonfirmuara që tregonin se edhe 20 pengje të tjerë mund të kenë vdekur.

Më shumë se 240 pengje izraelite u morën në Gaza nga Hamasi dhe grupet e tjera militante, si dhe nga civilët e Gazës. Mbi 100 prej tyre u liruan në një marrëveshje pengjesh vitin e kaluar në këmbim të lirimit të të burgosurve femra dhe fëmijë palestinezë. Fati i të tjerëve mbetet i panjohur.

Negociatat e ndërmjetësuara me Hamasin

Benjamin Netanyahu është nën presion në rritje për të arritur një marrëveshje për kthimin e robërve të mbetur izraelitë. Protestat që kërkojnë lirimin e pengjeve janë intensifikuar javët e fundit ndërsa Izraeli është ende në negociata të ndërmjetësuara me Hamasin.

Të martën, Gadi Eisenkot, një anëtar i kabinetit të luftës të zotit Netanyahu, djali i të cilit vdiq duke luftuar në Gaza vitin e kaluar, la të kuptohej se publiku izraelit do të duhej të përgatitej për një kompromis të pakëndshëm me Hamasin nëse do të dëshironte të shihte pengjet të liroheshin përmes një marrëveshjeje.

"Ndoshta do të ketë një çmim të lartë që ne duhet ta pranojmë me guxim për të rikthyer ata që lejuam për t'u kapur me 7 tetor, ndërsa ne vazhdojmë me qëllimet ushtarake për të shkatërruar Hamasin", tha ai.

Gjithashtu të martën, Anthony Blinken, Sekretari i Shtetit i SHBA, mbërriti në Kajro për të nxitur një armëpushim.

Vizita përkoi me shqetësimet në rritje se Izraeli mund të zgjerojë luftimet në jug deri në kufirin egjiptian, ku gjysma e të gjithë banorëve të Gazës po kërkojnë strehim nga luftimet e ashpra në qendër dhe në veri.

Të hënën mbrëma, ministri i mbrojtjes i Izraelit sugjeroi se operacioni tokësor i Izraelit do të zhvendosej përfundimisht në Rafah në kufirin egjiptian, ku gjysma e 2.2 milionë banorëve të Gazës të paraluftës ishin grumbulluar.

Të martën, agjencia humanitare e OKB-së tha se urdhrat e evakuimit të IDF-së për Gazën kishin prekur tashmë dy të tretat e enklavës së mbyllur.

Të paktën tre pengje izraelite janë vrarë aksidentalisht nga trupat izraelite teksa u përpoqën të arratiseshin.

Familjet e disa prej pengjeve dhe mbështetësit e tyre u mblodhën në qendër të Tel Avivit të martën në mbrëmje. Disa prej tyre mbanin postera duke shkruar "Nuk ka fitore pa kthimin e pengjeve".

Shefi i shtabit të IDF-së tha se ushtria më në fund kishte nisur hetimet për gabimet e mundshme të sigurisë të IDF-së ku ushtria ishte e përgatitur keq përballë sulmit të 7 tetorit.

Gjenerallejtënant Herzi Halevi mbrojti vendimin e ushtrisë për të mos filluar hetimin më herët, duke përmendur luftimet intensive në Gaza. Ai u zotua se do t'i "shkojë deri në fund" asaj që ndodhi në kufirin e Gazës në prag të sulmit dhe "s'do të mos lërë gur pa lëvizur".