Rebelët huthi përdorën një "varkë kamikaze" pa drejtues në tentativën e parë të një sulmi të këtij lloji nga grupi i mbështetur nga Irani kundër anijeve tregtare në Detin e Kuq.

Zyrtarët amerikanë thanë se grupi dislokoi një anije sipërfaqësore pa drejtues (USV) të mbushur me eksplozivë në një korridor të madh të anijeve në brigjet e Jemenit të enjten në mëngjes. Grupi i mbështetur nga Irani ka shënjestruar rregullisht anijet atje në javët e fundit.

Mjeti shpërtheu larg çdo anijeje tjetër, por zëvendësadmirali Brad Cooper, i cili komandon forcat detare amerikane në Lindjen e Mesme, tha se sulmi ishte "shqetësues".

"Ky ishte një sulm i njëanshëm, nga një mjet sipërfaqësor pa drejtues që ishte nisur nga territori i kontrolluar nga huthit, kishte kaluar tranzit në korridorin ndërkombëtar të transportit detar, qartazi me qëllimin për të bërë dëm," shtoi ai.

Ai tha se mjeti i ishte afruar disa kilometra një anijeje amerikane dhe se "ne të gjithë e pamë kur shpërtheu".

Kjo ndodh ndërsa forcat huthi të Jemenit të mbështetura nga Irani vazhdojnë sulmet e tyre ndaj anijeve tregtare që udhëtojnë përmes ngushticës Bab-el-Mandeb në Detin e Kuq – një korridor kryesor që përbën 10 për qind të tregtisë globale në det.

Huthit kanë bërë 25 sulme ndaj anijeve tregtare në rajon që nga 18 nëntori, duke detyruar kompanitë e mëdha të transportit detar të ridrejtojnë anijet që udhëtojnë nga Azia në Europë rreth kontinentit afrikan.

Sulmi i fundit sugjeron se grupi synon të vazhdojë të sulmojë në zonë, pavarësisht paralajmërimeve nga një koalicion detar ndërkombëtar i udhëhequr nga SHBA.

Shtetet e Bashkuara dhe Britania e Madhe mendohet se po shqyrtojnë nisjen e sulmeve proaktive kundër huthive në Jemen, pas valës së sulmeve ndaj anijeve tregtare që kanë parë rritje të çmimeve të transportit.

BP, gjiganti global i naftës, ka thënë se nuk do të transportojë më naftë përmes ngushticës Bab-el-Mandeb, duke ngritur shqetësime se çmimi i naftës mund të ndikohet gjithashtu.

Zyrtarët huthi thonë se forcat e tyre po shënjestrojnë anijet në shenjë mbështetjeje për Hamasin në mes të luftës në Gaza. Grupi ndihmohet nga Teherani, i cili më parë e ka përdorur atë për të sulmuar armiqtë e tij në Lindjen e Mesme./ Telegraph.co.uk-përktheu Syri.net