Operacioni i dorëzimit të pengjeve izraelite nga Hamasi dhe shkëmbimi me të burgosurit palestinezë do të jetë kompleks.

Komiteti Ndërkombëtar i Kryqit të Kuq tashmë ka një ekip brenda Gazës, veçanërisht për të ndihmuar në  lirimin e pengjeve. Sot atyre do t'u jepen detaje se ku saktësisht në Gaza duhet t'i marrin ata nga Hamasi. Mund të jetë një pikë takimi për të 13 pengjet që pritet të lirohen sot ose mund të jenë disa.

Operacioni është kompleks dhe nuk do të mund të ndodhte pa armëpushim dhe pa besuar të dyja palët në neutralitetin e Komitetit Ndërkombëtar të Kryqit të Kuq. Pasi Kryqi i Kuq të ketë futur pengjet në bord, ata do të dërgohen në kufirin me Egjiptin dhe do t'u dorëzohen forcave izraelite.

Përafërsisht në të njëjtën kohë, një ekip tjetër i Komitetit Ndërkombëtar të Kryqit të Kuq në Izrael do të kontrollojë shëndetin e të burgosurve palestinezë që Izraeli ka rënë dakord të lirojë dhe do të konfirmojë se ata në të vërtetë duan të dërgohen në shtëpi.

Është punë në të cilën Kryqi i Kuq ka përvojë të gjatë. Në prill ai lehtësoi edhe shkëmbimin e 900 robërve të luftës në Jemen.

Kryqi i Kuq nuk negocion lirime të tilla, por do të jetë organi neutral që do të kryejë atë që kanë rënë dakord palët ndërluftuese – në këtë rast lirimin e pengjeve./ar.sh/SYRI.NET

​