Nga Paul Ronzheimer, BILD

Ai ka këshilluar kryeministrin Netanyahu, ka qenë ambasador i Izraelit në SHBA dhe konsiderohet një ekspert i jashtëm i vendit. BILD u takua me Michael Oren në Tel Aviv dhe foli me të për luftën në dy fronte, rolin e SHBA dhe pse ai e konsideron Hezbollahun shumë më të rrezikshëm për Izraelin sesa terroristët e Hamasit.

Zoti Oren, ju keni qenë ambasador i Izraelit në SHBA. A do të marrin pjesë SHBA ushtarakisht në luftën kundër Hamasit?

Izraeli ka forca speciale dhe SHBA ka forca speciale që stërviten këtu, si SEAL Team 6. Një nga qëllimet e tyre është të shpëtojnë pengjet, kështu që unë nuk e përjashtoj këtë. Presidenti mbajti një fjalim, në të cilin ai përmendi se SHBA po lëvizin burime të rëndësishme në Mesdheun Lindore dhe Ngushticën e Gjirit Persik për të dërguar një paralajmërim si për Hezbollahun, ashtu edhe për shefin e tij në Iran: Mos u përfshini në këtë konflikt!

Deri në çfarë mase do të përfshihen SHBA?

Presidenti tha se nuk do të kishte trupa tokësore. Kjo do të thotë se ata nuk do të dërgojnë trupa në Bejrut apo Teheran. Por ai përmendi gjithashtu se kanë shtuar avionët e tyre luftarakë. Në bordin e aeroplanmbajtëseve ka teknologji të rëndësishme të mbrojtjes raketore, kështu që mund të thuhet se SHBA i ka zhvendosur këto asete në Mesdhe dhe në Gjirin Persik për t’i siguruar Izraelit mbrojtje shtesë kundër raketave.

Avionët reaktivë nuk rrëzojnë raketa. Avionët reaktivë sulmojnë objektivat në tokë. Për mua, ky është një paralajmërim shumë i qartë se SHBA po pozicionohet me mundësinë e ndërhyrjes në një luftë rajonale të Lindjes së Mesme.

Nëse SHBA ndërhyjnë, a do të merrnin pjesë edhe shtete të tjera arabe?

Kjo varet nga çfarë kuptoni me pjesëmarrje. A do të përfshihen në nivel inteligjence? Kështu mendoj. A do të përdorin arabët forcat e armatosura? Dyshoj shumë.

Sa e rrezikshme është situata për Izraelin? Nëse ka një luftë me dy fronte dhe Hezbollahu është i përfshirë, ai ka më shumë raketa dhe mund të sulmojë Tel Avivin.

Është shumë e rrezikshme, por unë kam një mendim të kundërt. Në vend që të nisim një ofensivë tokësore kundër Rripit të Gazës, tani duhet të fillojmë një sulm kundër Hezbollahut, me të gjithë vështirësitë që sjell. Ne duhet të frenojmë Hamasin, të vazhdojmë të synojmë të izolojmë Hamasin, por në të njëjtën kohë të përqendrojmë energjitë tona te Hezbollahu, i cili përbën një kërcënim më të madh se Hamasi.

Çfarë nënkuptoni me përqendrim?

Hamasi ka 15 mijë raketa, Hezbollahu ka 1500 mijë, duke përfshirë disa raketa shumë të sakta, kundër të cilave ne nuk kemi mbrojtje shumë të mirë. Ata kanë një forcë që ka vite që lufton në Siri dhe është shumë me përvojë dhe e trajnuar mirë. Ata kanë linja furnizimi, kanë liri gjeografike, ndërsa Hamasi është i përmbajtur.

Ju mendoni se Izraeli fillimisht duhet të luftojë Hezbollahun. A mendoni se tashmë është marrë vendimi për strategjinë se ku duhet të veprohet së pari?

Mendoj se po. Unë mendoj se tani ekziston një koncept që ne duhet të heqim menjëherë Hamasin nga sundimi i tij në Gaza, duhet të hakmerremi. Unë i kuptoj të gjitha këto, e kuptoj emocionalisht, por gjithashtu ndjej se Hamasi është i bllokuar në Gaza. Ne mund të vazhdojmë t’i sulmojmë ata nga ajri, mund të vazhdojmë t’i sulmojmë nga deti dhe nga toka. Nuk mund të shkojnë askund. Pengjet do mbeten pengje, çfarëdo që të ndodhë. Është shumë më e vështirë. Hezbollahu është të paktën dhjetë herë më i rrezikshëm se Hamasi.

Sa e mbingarkuar do të ishte Kupola e Hekurt në një luftë me dy fronte?

Po, mendoj se është shumë për Kupolën e Hekurt. Në Luftën e Dytë të Libanit në vitin 2006, Izraeli u godit me 200 deri në 400 raketa në ditë; në luftën e ardhshme me Hezbollahun llogaritet se do ketë 4 mijë deri në 6 mijë raketa në ditë. Nuk ka alternativë për të dërguar ushtrinë në Libanin jugor dhe për të shkuar fshat më fshat e shtëpi më shtëpi.