Varshavë, Poloni - Një mosmarrëveshje nëse gruri ukrainas duhet të lejohet të hyjë në tregjet e brendshme të Polonisë dhe vendeve të tjera të Bashkimit Evropian, i ka çuar marrëdhëniet e ngushta midis Kievit dhe Varshavës në pikën e tyremë të ulët që kur Rusia pushtoi Ukrainën vitin e kaluar.

Udhëheqësit polakë e kanë krahasuar Ukrainën me një person të mbytur që lëndon ndihmësin e tij dhe kanë kërcënuar se do të zgjerojnë ndalimin e produkteve ushqimore nga vendi i shkatërruar nga lufta. Ndërkohë, presidenti ukrainas Volodymyr Zelenskyy sugjeroi se aleatët e BE-së që po ndalojnë importet e drithërave të vendit të tij po ndihmojnë Rusinë.

Polonia, në krahun lindor të NATO-s, ka qenë një mbështetëse e vendosur e Ukrainës, duke dërguar armë dhe ndihma humanitare dhe duke hapur kufijtë e saj për refugjatët.

Polonia do ta ndalë furnizimin me armë të Ukrainës për shkak të grurit

Një nga aleatët më të vendosur të Ukrainës, Polonia, ka njoftuar se nuk do ta furnizojë më armë këtë vend, pasi një mosmarrëveshje diplomatike për drithërat përshkallëzohet.

Kryeministri i vendit tha se në vend të kësaj do të fokusohet në armatosjen me armë më moderne. Vendimi u mor në një kohë kur tensionet midis dy kombeve po rriten.

Të martën, Polonia thirri ambasadorin e Ukrainës lidhur me komentet e bëra nga Presidenti Volodymyr Zelensky në OKB.

Ai tha se disa vende ishin shtirur si në solidaritet me Ukrainën, të cilën Varshava e denoncoi si "të pajustifikuar në lidhje me Poloninë, e cila e ka mbështetur Ukrainën që në ditët e para të luftës".

Kryeministri i Polonisë, Mateusz Moraëiecki e njoftoi vendimin për të mos furnizuar më Ukrainën me armë në një fjalim televiziv të mërkurën, pas një dite të përshkallëzimit të shpejtë të tensioneve midis dy vendeve për importet e grurit.

"Ne nuk po transferojmë më armë në Ukrainë, sepse tani po armatosim Poloninë me armë më moderne," tha zoti Moraëiecki.

Mosmarrëveshja e grurit filloi pas pushtimit të plotë të Ukrainës nga Rusia, e cila mbylli korsitë kryesore të transportit të Detit të Zi dhe e detyroi Ukrainën të gjente rrugë alternative tokësore.

Kjo nga ana tjetër çoi në sasi të mëdha drithi që përfundonin në Evropën Qendrore.

Rrjedhimisht, Bashkimi Evropian ndaloi përkohësisht importet e grurit në pesë vende, Bullgari, Hungari, Poloni, Rumani dhe Sllovaki, për të mbrojtur fermerët vendas, të cilët kishin frikë se drithi ukrainas po ul çmimet në vend.

Ndalimi përfundoi më 15 shtator dhe BE zgjodhi të mos e rinovojë atë, por Hungaria, Sllovakia dhe Polonia vendosën të vazhdojnë ta zbatojnë atë.

Komisioni Evropian ka deklaruar vazhdimisht se nuk i takon anëtarëve individualë të BE-së të bëjnë politikën tregtare për bllokun.

Në fillim të kësaj jave, Ukraina ngriti padi në Organizatën Botërore të Tregtisë (OBT) kundër këtyre vendeve lidhur me ndalimet, të cilat sipas saj ishin një shkelje e detyrimeve ndërkombëtare.

Ministrja e Ekonomisë e Ukrainës, Yulia Svyrydenko tha se ishte "me rëndësi thelbësore për ne të provojmë se shtetet anëtare individuale nuk mund të ndalojnë importet e mallrave ukrainase".

Por Polonia tha se do ta mbante ndalimin në fuqi dhe një "ankesë përpara OBT-së nuk i ndikonte"./ar.sh/SYRI.NET